مسلم لیگ ن کے رہنما احسن اقبال نے کہا ہے کہ جس ملک کی ثقافت چھن جائے تو اس کی نسل تباہ ہو جاتی ہے۔

احسن اقبال نے سیمینار سے خطاب کرتے ہوئے کہا کہ پاکستان میں بدقسمتی یہ ہے کہ نظام تعلیم پر غیر منتخب حکومتوں کے سائے رہے ہیں۔

مسلم لیگ ن کے رہنما کا کہنا تھا کہ پاکستان نے دو نسلیں کھو دیں ہیں، اگلی کو بچانے کی کوشش کرنی چاہیے۔ او لیول کرنے والی نئی نسل سے پوچھا جائے کہ مولانا ظفر علی کون تھے تو وہ نہیں بتا سکتے۔

احسن اقبال کا کہنا تھا کہ ہمارا مسئلہ اردو یا انگلش نہیں بلکہ رٹا سسٹم اور تحقیقی نظام تعلیم میں فرق ہے۔

ان کا کہنا تھا کہ سی ایس ایس کے امتحان انگریزی کے ساتھ ساتھ اردو میں بھی ہونے چاہیے، جس ملک کی ثقافت چھن جائے اس کی نسل تباہ ہو جاتی ہے۔

انہوں نے کہا کہ موجودہ حکومت ماضی کی نفی کر کے کہتی ہے پاکستان 2018 کے بعد ہی کامیاب ہوا، مختلف سیاسی جماعتیں مکمل سچ میں اپنا حصہ بیان کر رہے ہوتے ہیں۔

احسن اقبال کا مزید کہنا تھا کہ ہم نے اپنے دور میں انٹر پرونس منسٹریل کمیٹی اور نیشنل کریکولم ریفارمز تشکیل دیں۔