محمد اعظم خان سواتی نے کہا ہے کہ پاکستان ریلوے اپنے کاروبار کے تمام شعبوں میں تعاون کا ارادہ رکھتا ہے۔

وفاقی وزیر ریلوے محمد اعظم خان سواتی سے مصری سفیر طارق محمد حسین دہروگ کی قیادت میں ایک اعلیٰ سطحی وفد نے ملاقات کی جس میں دونوں ممالک کے درمیان ریلوے تعاون کے مختلف شعبوں اور ریلوے لائنوں کے لیے موزوں مقامات کے حوالے سے بات چیت ہوئی۔

وفد نے وفاقی وزیر ریلوے کو دی عرب آرگنائزیشن فار انڈسٹریلائزیشن (AOI) کی تکنیکی صلاحیتوں کے بارے میں بریفنگ دی۔

وزیر ریلوے نے اس موقعے پر کہا کہ وفدکا دورہ پاکستان دونوں ممالک کی ریلوے کے لیے بہتری کی نوید ثابت ہو گا۔

اعظم سواتی کا کہنا تھا کہ پاکستان ریلوے اپنے کاروبار کے تمام شعبوں میں تعاون کا ارادہ رکھتا ہے اور ادارے کی بہتری کے لیے ہر ممکن اقدامات کرے گا۔

مصری سفیر نے پاکستان ریلوے کو ایک مستحکم ادارہ بنانے کے لیے موجودہ حکومت کے اقدامات کو سراہا۔

یہ وفد اگلے ہفتے پاکستان ریلوے کی ورکشاپس، ڈویژنوں اور ذیلی دفاتر کا دورہ کرے گا جس سے وفد کے ارکان پاکستان ریلوے کی ورکنگ کے بارے میں آگاہ ہو سکیں گے۔

وفد کے ارکان میں عرب تنظیم برائے صنعت کاری برائے ترقی کے بورڈ آف ڈائریکٹرز کے چیئرمین کے مشیر احمد حامد مرسی، عرب تنظیم برائے صنعت کاری برائے تکنیکی امور کے بورڈ آف ڈائریکٹرز کے چیئرمین کے مشیر عبدالمحسن عبدالصادق عبدالسلام موجود تھے۔

اس ملاقات میں ہاسکو گلوبل کنسلٹنگ کے صدر ڈاکٹر ہانی کمال شاہین، انفرا ون کمپنی کے صدر ڈاکٹر محمود محمد السید السعید جمال الدین، سیماف مینوفیکچرنگ کے بورڈ آف ڈائریکٹرز کے چیئرمین کے مشیر عبد اللہ عبدالحافظ حسن حمودہ اور چیئرمین کے مشیر بورڈ آف ڈائریکٹرز برائے سیماف مارکیٹنگ ڈاکٹر نینس خلیل محمد احمد شامل تھے۔