صدر آزاد جموں وکشمیر نے کہا ہے کہ ہماری جدوجہد اب مقبوضہ کشمیر کی آزادی تک جاری رہے گی۔

صدر آزاد جموں وکشمیر بیر سٹر سلطان محمود چوہدری سے چیف جسٹس آزاد جموں وکشمیر سپریم کورٹ راجہ سعید اکرم کی ایوان صدر کشمیر ہاؤس اسلام آباد میں ملاقات ہوئی جس میں مختلف آئینی تقرریوں کے حوالے سے مشاورت کی گئی جبکہ باہمی دلچسپی سمیت دیگر امور پر بھی تبادلہ خیال کیا گیا۔

  اس موقع پر سلطان محمود چوہدری نے آل پارٹیز کشمیر کانفرنس کے فیصلوں کی روشنی میں اسلام آباد میں منعقدہ کشمیر ریلی کے بعد آل پارٹیز کشمیر کانفرنس سے دوبارہ مشاورت کے بعد 17مارچ بروز جمعرات کو آزادی کے بیس کیمپ کے دارالحکومت مظفرآباد میں ایک بڑی کشمیر ریلی کے انعقاد کا اعلان کر دیا ہے۔

صدر آزاد جموں وکشمیر نے کہا کہ اس ریلی سے مقبوضہ کشمیر کے عوام کو اس بات کا یقین دلایا جائے گا کہ وہ اپنی جدوجہد میں تنہا نہیں بلکہ آزادکشمیر کا بچہ بچہ اُن کی جدوجہد میں اُن کے شانہ بشانہ ہے اور جب تک مقبوضہ کشمیر بھارتی تسلط سے آزاد نہیں ہو جاتا ہماری یہ جدوجہد جاری رہے گی۔

ان کا کہنا تھا کہ ہماری یہ جدوجہد اب مقبوضہ کشمیر کی آزادی تک جاری رہے گی اور آزادکشمیر کی تمام سیاسی جماعتوں کے قائدین کا کشمیر کی آزادی کے ایک نقطے پر متفق ہونے سے مقبوضہ کشمیر کے عوام کے حوصلے بلند ہونگے۔

صدر آزاد جموں وکشمیر بیر سٹر سلطان محمود چوہدری کا مزید کہنا تھا کہ ہماری جدوجہد اندرون و بیرون ملک مسئلہ کشمیر کو عالمی سطح پر اُجاگر کرنے کے لئے بھرپور انداز میں جاری و ساری رہے گی لہذا آزادکشمیر کی عوام 17مارچ کو دارالحکومت مظفرآباد میں منعقدہ ریلی میں بھرپور اندا ز میں شرکت کریں۔