سید نیئر بخاری نے کہا ہے کہ تحریک عدم اعتماد کے معاملے پر اسد قیصر غیر جانبدار نہیں رہے۔

پیپلز پارٹی نے اسپیکر قومی اسمبلی اسد قیصر کو اپنے عہدے سے فوری الگ ہونے کا مطالبہ کر دیا ہے۔

سید نیئر بخاری نے اپنے بیان میں کہا کہ اپوزیشن کی تحریک ناکام ہونے سے متعلق کسٹوڈین آف دی ہاوس کا بیان انتہائی قابل افسوس ہے، تحریک عدم اعتماد کے معاملے پر اسپیکر قومی اسمبلی اسد قیصر غیر جانبدار نہیں رہے۔

رہنماء پاکستان پیپلز پارٹی نے کہا کہ اسپیکر اسد قیصر مسلسل وزیراعظم کی حمایت اور اپوزیشن مخالف بیانات دے کر ایک پارٹی کے طور پر سامنے آگئے ہیں، خدشات ہیں کہ اسپیکر اپوزیشن کے راستوں میں رکاوٹیں کھڑی کریں گے۔

ان کا کہنا تھا کہ اسپیکر اسد قیصر کو احساس ہونا چاہیے کہ وہ تحریک انصاف کے کارکن نہیں بلکہ کسٹوڈین آف دی ہاوس ہیں، اس طرح کھل کر حکومت کی حمایت کے بعد اسپیکر کو فوری عہدہ چھوڑ دینا چاہیے۔