وزیرخارجہ نے کہا ہے کہ سندھ کو جوڑنا ہے تو تیر کو توڑنا ہے۔

تحریک انصاف کے وائس چیئرمین مخدوم شاہ محمود قریشی نے بدین میں جلسہ عام سے خطاب کرتے ہوئے کہا کہ میں نے بولا تو زرادری بولے گا بولتا ہے، آج بدین نے زرداری کی بولتی بند کردی ہے۔

وزیرخارجہ کا کہنا تھا کہ ہم سندھ کے حقوق کے لئے نکلے کیونکہ یہ سوداگروں کے ہاتھ میں ہے، سندھ ان سوداگروں سے آزادی چاہتا ہے۔

شاہ محمود قریشی نے کہا کہ کہتے ہیں اسلام آباد ساڑھے تین سال کا حساب لینے گئے ہیں تو ہم ساڑھے تین سال کا حساب دیں گے جس سے مانگ رہے وہ بھی دیگا لیکن آپ بھی تو سندھ کا پندرہ سال کا حساب دیں۔

انہوں نے کہا کہ قومی صحت کارڈ اور سندھ کی عوام میں رکاوٹ پیپلزپارٹی حکومت ہے۔ کیا بدین، حیدرآباد، مٹھی عمرکوٹ کی عوام کو صحت کارڈ کی ضرورت نہیں ہے؟

وزیرخارجہ کا کہنا تھا کہ پیپلزپارٹی بینظیر کی پارٹی نہیں رہی بلکہ پیپلزپارٹی اس وقت زرداری لیگ بن چکی ہے، میں زرداری کی حکومت میں اہم وزارت چھوڑ کر ان سے الگ ہوا۔

شاہ محمود قریشی کا یہ بھی کہنا تھا کہ سندھ کو جوڑنا ہے تو تیر کو توڑنا ہے، اب وقت آگیا ہے بدین والو فیصلہ کرلو زرداری کی دیوار گرانی ہے۔

وزیرخارجہ شاہ محمود قریشی کا مزید کہنا تھا کہ بدین والوں نے آج تیر کو توڑنے کا اعلان کردیا ہے، ہم نے جو حقوق سندھ کا آغاز کیا ہے یہ اپنے منطقی انجام کو پہنچائے گے۔