فرخ حبیب نے کہا ہے کہ وزیراعظم عمرا خان صاحب استعفیٰ نہیں دیں گے اور آخری گیند تک مقابلہ کریں گے۔

سپریم کورٹ کے باہر میڈیا سے بات کرتے ہوئے وزیر مملکت برائے اطلاعات فرخ حبیب نے کہا عمران خان سے زیادہ کوئی مقابلہ کرنا نہیں جانتا ہے۔

عدم اعتماد لانے والے تمام لوگ چور ہیں جبکہ عمران خان صاحب کے خلاف کوئی کیس کوئی اکاؤنٹ موجود نہیں ہے اور معاشرہ ہمیشہ کرپشن کے خلاف پر لڑتا ہے۔

ان کا کہنا تھا کہ عوام چاہتی ہے کہ ضمیر فروشوں کا راستہ روکا جائے اور اسی لئے آج قوم عمران خان کے ساتھ کھڑی ہے۔

انہوں نے کہا کہ آج اسپیکر نے کوئی غیر قانونی کام نہیں کیا ہے کیونکہ جب بھی کوئی رکن فوت ہوتا ہے تو فاتحہ خوانی کے بعد اجلاس مؤخر کردیا جاتا ہے ، پہلے بھی کئی بار ایسا ہوچکا ہے۔

 فرخ حبیب نے کہا کہ آج کے ملتوی ہونے والے اجلاس پر اپوزیشن رو رہی ہے کیونکہ ان کے پاس اب رونے دھونے اور منت سماجت کرنے کے علاوہ کچھ باقی نہیں رہا ہے۔

انہوں نے کہا کہ  اپوزیشن کہتی ہے ان کے پاس نمبرز پورے ہیں لیکن پھر بھی گھبراہٹ کا شکار نظر آرہے ہیں۔

ان کا کہنا تھا جو کہ 24 تاریخ کو اپنے جلسے کا اعلان کرچکے تھے لیکن بندے جمع نہ ہوئے تو یہ مارچ 26 تاریخ کو لے گئے ہیں اور تب بھی ان کے پاس لوگ موجود نہیں ہونگے۔

انہوں نے یقین دہانی کرائی کہ 27 تاریخ کو اس ملک کی عوام عمران خان کے ساتھ کھڑی ہوئی نظر آئیگی کیونکہ یہ سب جانتے ہیں کہ وزیراعظم صاحب اچھائی اور سچائی کے ساتھ کھڑے ہوئے ہیں۔

انہوں نے مزید کہا کہ ہمارے تمام اتحادی ہمارے ساتھ ہیں اور انشاء اللہ آگے بھی ہم اس ملک کی بقاء کے لئے ساتھ کھڑے ہوئے نظر آئینگے۔

وزیر مملکت کا کہنا تھا کہ ہم عدم اعتماد کے خلاف نہیں ہیں لیکن یہ کوئی طریقہ نہیں ہے کہ ہارس ٹریڈنگ کے ذریعے لوگوں کو خریدیں۔

انہوں نے بتایا کہ ہر سیاسی جماعت کو یہ حق حاصل ہے کہ جمہوری حق کو استعمال کرے اور اس حوالے سے 27 مارچ کو پورے پاکستان کو نظر آجائیگا کہ عوام کس کے ساتھ کھڑی ہے اور جلد ہی سرپرائزز ملنا شروع ہوجائیں گے۔