خیبرپختونخوا اسمبلی کا اجلاس ڈپٹی اسپیکر محمود جان کی زیرصدارت آج ہوا تھا۔

اجلاس کے دوران ڈپٹی اسپیکر نے ہدایت کی کہ جن اراکین اسمبلی نے اثاثے ڈکلئیر نہیں کیے وہ جلد ڈکلئیر کریں۔

دوران اجلاس ڈپٹی اسپیکر محمود خان نے کہا کہ اثاثے ڈکلئیر نہ کیے جانے تک متعلقہ چھ اراکین کی اسمبلی رکنیت معطل رہے گی۔

علاوہ ازیں اسمبلی میں مختلف قراردادیں منظور کی گئی جن میں پولیس کی تنخواہ، اسپتالوں میں رش کم کرنے اور وزیراعظم کے حق میں بھی قرارداد منظور کی گئی۔

خیبر پختونخوا اسمبلی نے وزیراعظم عمران خان کے حق میں قرار داد منظور کر لی گئی ہے جو کہ صوبائی وزیر شوکت یوسفزئی نے پیش کی تھی۔

قرارداد میں بتایا گیا ہے کہ کورونا کی وجہ سے بڑی بڑی معیشتیں بحران کا شکار ہوئیں لیکن وزیراعظم عمران کی بصیرت اور قائدانہ صلاحیتوں کی بدولت پاکستان اس بحران سے بچا رہا۔

پاکستان کی معاشی صورت حال کو بہتر انداز میں مضبوط کیا جس کی پیش نظر صوبائی اسمبلی اس کارنامے پر وزیراعظم کو خراج تحسین پیش کرتی ہے۔

ایم پی اے ڈاکٹر سمیرا شمس کی صوبائی اسمبلی میں خواتین کے حق میں قرارداد منظور کی گئی ہے۔

قرارداد کے مطابق بلدیاتی نظام کے تحت بننے والے ولیج، نیبرہوڈ اور تحصیل کونسل کے اجلاسوں میں خواتین ممبران کی موجودگی کو لازمی قرار دیا جائے اور خواتین ممبر کے بغیر کسی بھی کونسل کا اجلاس منعقد نہ کیا جائے۔