حمزہ شہباز نے کہا ہے کہ ہماری حکومت نے آٹے کی قیمت میں کمی کر کے صوبے کے عوام کی مشکلات کم کی ہیں۔

وزیراعلیٰ پنجاب حمزہ شہباز سے وفاقی وزیر ایاز صادق اور ایم پی اے خواجہ سلمان رفیق کی ملاقات ہوئی جس میں باہمی دلچسپی کے امور، سیاسی صورتحال اور عوام کو مہنگائی سے ریلیف دینے کیلئے اقدامات پر تبادلہ خیال کیا گیا۔

حمزہ شہباز نے کہا کہ عمران نیازی کے پونے چار سال کے دوران عوام مہنگائی کی چکی میں پس کررہ گئے۔

انہوں نے یہ بھی کہا کہ ہماری حکومت نے آٹے کی قیمت میں کمی کر کے صوبے کے عوام کی مشکلات کم کی ہیں، صوبے بھر میں 10 کلو آٹے کا تھیلا 650 روپے کی بجائے 490 روپے میں مل رہا ہے۔

حمزہ شہباز کا کہنا تھا کہ عام آدمی کو 10 کلو آٹا تھیلے پر 160 روپے کا ریلیف دیا گیا ہے، چینی اور گھی کی قیمتوں میں کمی لانے کیلئے بھی اقدامات کئے جا رہے ہیں۔

وزیراعلیٰ پنجاب حمزہ شہباز کا مزید کہنا تھا کہ عوام نے عمران نیازی کے انتشار مارچ کا دھڑن تختہ کردیا۔آڈیو لیک میں عمران نیازی اپنے لئے این آر او کی بھیک مانگتا رہا، آڈیولیک نے سازش کا پردہ چاک کردیا۔

اس موقع پر وفاقی وزیر ایاز صادق نے کہا کہ آٹا سستا کرنے کا اقدام قابل تحسین ہے، آپ نے آٹا سستا کر کے مہنگائی میں پسے عوام کو حقیقی ریلیف دیا ہے۔