سلطان محمود چوہدری نے کہا ہے کہ جاپان پاکستان اور بھارت کے درمیان مسئلہ کشمیر کو حل کرانے کیلئے اپنی کاوشیں کرے۔

تفصیلات کے مطابق صدر ریاست آزاد جموں وکشمیر بیرسٹر سلطان محمود چوہدری نے ایوان صدر کشمیر ہاؤس اسلام آباد میں جاپان ایمبیسی کے پولیٹیکل کونسلر ناکا گاوا یاسوشی سے ملاقات کی ہے۔

انہوں نے کہا کہ پاک بھارت دونوں ایٹمی طاقتیں ہیں اور دونوں ممالک کے درمیان کوئی بھی چھوٹا یا بڑا حادثہ ایک بڑی جنگ کا پیش خیمہ ثابت ہو سکتا ہے۔

ان کا کہنا تھا کہ جاپان انڈیا اور پاکستان دونوں ممالک کا دوست ہے لہذا وہ مسئلہ کشمیر کو حل کرانے کے لئے اپنا بھرپور کردار ادا کر سکتا ہے۔

سلطان محمود چوہدری کا یہ بھی کہنا تھا کہ جاپان ایشیاء میں واحد ملک ہے جو خطے میں بہتر ی کے لئے اپنا رول ادا کر سکتا ہے۔

صدر ریاست آزاد جموں وکشمیر بیرسٹر سلطان محمود چوہدری نے مزید کہا کہ جاپان ناگاساکی اور ہیروشیما میں ایٹمی تباہ کاریوں کو دیکھ چکا ہے لہذا وہ جنوبی ایشیاء کی سنگین صورتحال کو بخوبی سمجھ سکتا ہے۔