ڈی سی لاہور عمر شیر چٹھہ نے کہا ہے کہ ڈینگی کے تدارک کے لیے تمام محکمے مل کر اپنی ذمہ داریاں پوری کریں۔

ڈی سی لاہور عمر شیر چٹھہ کی زیر صدارت انسداد ڈینگی مہم پر اہم اجلاس کا انعقاد ہوا جس میں ڈینگی کے حوالے سے جاری سرگرمیوں پر تفصیلی بریفنگ دی گئی۔

عمر شیر چٹھہ کا اس موقعے پر کہنا تھا کہ عوام کو ڈینگی سے بچاؤ کے لئے زیادہ سے زیادہ آگاہی فراہم کی جائے، ہاٹ سپاٹس پر خصوصی توجہ دی جائے۔

ان کا کہنا تھا کہ ڈینگی لاروا کے سلسلے میں چیکنگ کو یقینی بنایا جائے اور ڈینگی لاروا کی نشاندہی پر لاروا کو فوری تلف کیا جائے۔

انہوں نے کہا کہ کباڑ خانوں، نرسریوں، سروس اسٹیشنز، ٹائر شاپس اور گھروں کی چھتوں کی چیکنگ کو یقینی بنایا جائے اور اس کے علاوہ عوام الناس بھی احتیاطی تدابیر کو اپنائیں کیونکہ احتیاطی تدابیر اختیار کرنے سے ہی ڈینگی سے بچاؤ ممکن ہے۔

اجلاس میں ایڈیشنل ڈپٹی کمشنر جنرل ڈاکٹر مجتبٰی بھروانہ سمیت دیگر افسران نے شرکت کی۔