اپوزیشن لیڈر راجہ ریاض نے کہا ہے کہ کینیڈین پارلیمنٹ کے رکن نے پاکستانی اداروں پر تنقید کی۔

راجہ ریاض نے قومی اسمبلی کے اجلاس میں اظہار خیال کرتے ہوئے کہا کہ کینیڈین رکن پارلیمنٹ کے بیان کی مذمت کرتا ہوں۔

ان کا یہ بھی کہنا تھا کہ شاہ محمود قریشی نے اس ایوان میں کھڑے ہو کر استعفیٰ دیا تو اسپیکر اس استعفیٰ کو منظور کریں۔

اس کے علاوہ جماعت اسلامی کے رکن قومی اسمبلی مولانا عبد الاکبر چترالی نے بھی قومی اسمبلی کے اجلاس میں اظہار خیال کرتے ہوئے کہا کہ ایاز صادق نے مجھے گزشتہ جمعہ کو ایوان کے اندر دھمکی دی کہ حکومتی نشستوں پر آجائیں اور اپنے حلقے کے ترقیاتی کام کرائیں، میرے حلقے کے عوام دینی نظریہ رکھتے ہیں، کرپشن اور بیڈ گورننس کے خلاف بات کرنا میری عوام کا مطالبہ ہے۔

ان کا کہنا تھا کہ ایسے کرنا ہے تو پہلی اور آپ کی حکومت میں کیا فرق ہے؟ کہا گیا کہ میں حکومتی نشستوں پر نہ گیا تو میرے خلاف ریفرنسز لائیں گے، ایم ایم اے نے تحریک عدم اعتماد پر ووٹ دینے کا فیصلہ نہیں کیا تھا بلکہ تحریک عدم اعتماد پر ووٹ ڈالنا پی ڈی ایم کا فیصلہ تھا۔

انہوں نے کہا کہ ہر رکن اپنی حدود میں رہے کیونکہ میں نظریاتی کارکن ہوں تو بکنے والا نہیں، میں پارٹی یا چہرے نہیں نظام کی تبدیلی کی بات کرتا ہوں، چیلنج کرتا ہوں ابھی میرے خلاف ریفرنس لائیں میں اس کا جواب دوں گا۔