انجمن تاجران کی مرکزی قیادت نے واپڈا بلوں میں ناجائز ٹیکسوں کے خلاف احتجاج ریلی نکالی۔

تفصیلات کے مطابق ریلی میں مہنگائی کے مارے تاجروں کی بڑی تعداد نے شرکت کی۔

ریلی کے شرکا نے بجلی کے بلوں میں ناجائز ٹیکس کے اضافے کو مسترد کرتے ہوئے کہا کہ اگر حکومت نے بجلی کے بلوں میں ناجائز ٹیکس کو واپس نہ لیا تو غیر معینہ مدت کی ہڑتال کا اعلان کر دیں گے۔

شرکا کا کہنا تھا کہ حکومت نے مہنگائی میں پسی عوام پر بجلی کے بلوں میں بے جا ٹیکس لگا کر لوگوں کو زندہ درگور کر دیا ہے، حکومت ظالمانہ ٹیکس کا فیصلہ فوری واپس لے۔

ریلی کے شرکا نے کہا کہ ہزاروں روپے کے بلاجواز ٹیکس سراسر زیادتی ہے، ہم واپڈا افسران اور حکومت وقت سے مطالبہ نہیں کر رہے بلکہ یہ الٹی میٹم دے رہے ہیں کہ حکومت فوری طور پر بجلی بلوں میں اضافہ واپس لے، اگر یہ ظالمانہ ٹیکس واپس نہ لیے گئے تو دما دم مست قلندر ہو گا۔

ان کا مزید کہنا تھا کہ ہمارا احتجاج مطالبات کی منظوری تک جاری رہے گا، مرکز کو بھی اپنے احتجاج میں شامل کیا جائے گا۔