تحریک انصاف کی ضمنی الیکشن میں واضح برتری کے حوالے سے بیرون ملک میں اوورسیز پاکستانیوں کا ردعمل سامنے آگیا۔

 فرانس میں اوورسیز پاکستانیوں کا کہنا کہ آج پی ٹی آئی کے لیے خوشی کا دن ہے آج کے ضمنی انتخابات میں پی ٹی آئی نے تاریخی کامیابی حاصل کی ہے۔

 اوورسیز پاکستانیوں نے کہا کہ میں کامیاب ہونے والے امیدوارں، سپورٹرز ، ورکرز اور لیڈرشپ کو دل کی اتھاہ گہرائیوں سے مبارکباد پیش کرتے ہیں۔

واضح رہے کہ پنجاب کے 20 حلقوں میں ہونے والے ضمنی انتخابات کے غیر حتمی اور غیر سرکاری نتائج کے مطابق پاکستان تحریک انصاف نے 15 نشستیں اپنے نام کرلی ہیں جب کہ مسلم لیگ (ن) کو صرف 3 سیٹوں پر کامیابی ملی اور ایک سیٹ آزاد امیدوار کے حصے میں آئی۔

پنجاب میں پی ٹی آئی اتحاد کو سادی اکثریت حاصل ہوگئی ہے اور یوں پنجاب کے وزارت اعلیٰ کی سیٹ اب تحریک انصاف کے امیدوار کی ہی ہوگی، پی ٹی آئی اتحاد نے 186 نشستیں حاصل کرلی ہیں، پنجاب میں پی ٹی آئی کی 176 اور مسلم لیک (ق) کی 10 نشستیں ہیں۔

پولنگ صبح آٹھ بجے شروع ہوئی جو بغیر کسی وقفے کے پانچ بجے تک جاری رہی، اس موقع پر سیکیورٹی کے سخت انتظامات کیے گئے تھے،  صوبے کے 14 اضلاع کے ضمنی انتخابات میں 175 امیدوار آمنے سامنے ہیں۔