وفاقی وزیر صحت عبدالقادر پٹیل نے کہا ہے کہ وفاقی حکومت کی جانب سے سیلاب متاثرین کی ہر مکمن مدد کی جائیگی۔

پاکستان پیپلز پارٹی کے رہنما عبدالقادر پٹیل نے ٹھٹھہ میں تقریب سے خطاب کرتے ہوئے کہا کہ ملک میں حالیہ بارشوں اور سیلاب کے باعث تباہ کاری سے دوچار ہیں۔

‘ہر فرد کو سیلاب متاثرین کی مدد کیلئے آگے آنا ہوگا’

انہوں نے کہا کہ وفاقی حکومت متاثرین کے ساتھ ہیں، سیلاب متاثرین کی ہر مکمن مدد کی جائیگی، مشکل کی اس گھڑی پر ہر فرد کو متاثرین کی مدد کیلئے آگے آنا ہوگا۔

عبدالقادر پٹیل نے کہا کہ مختلف این جی اوز کی جانب سے متاثرین کیلئے 9کروڑ مالیت کی ادویات دی گئی ہیں، ادویات متاثرین کے علاج معالجے میں کام آئیں گی۔

وفاقی وزیر نے کہا کہ سندھ کے 22 اضلاع کے متاثرین میں پہلے مرحلے میں 26 کروڑ مالیت کی 6 لاکھ سے زائد مچھر دانیاں تقسیم کی جائیگی۔

‘عمران خان دنیا کا سب سے بڑا بھکاری رہا ہے’

انکا کہنا ہے کہ عمران خان دنیا کا سب سے بڑا بھکاری رہا ہے، فنڈز کھانا اور ہر وقت شوکت خانم کے نام پر چندہ مانگنا اس کا وطیرہ رہا ہے۔

انہوں نے کہا کہ فارن فنڈنگ کیس میں الیکشن کمیشن میں ثابت ہوگیا ہے کہ کینسر کے نام پر جو فنڈ مانگتا رہا ہے جو اپنی سیاست پر لگاتا رہا ہے، الیکشن کمیشن نے عمران کو ایک سزا یافتہ ملزم قرار دیا ہے۔

عبدالقادر پٹیل نے مزید کہا کہ عمران خان تم فنڈ مت جمع  کرو اللہ کے کئی بندے ہیں جو فنڈز جمع کرنے کے لئے جدوجہد کر رہے ہیں۔

وزیراعظم کی سیلاب متاثرین کے ریسکیو اور ریلیف کا عمل تیز کرنے کی ہدایت

وزیراعظم شہباز شریف کی جانب سے بارشوں کے نئے سلسلے کے پیش نظر ریسکیو اور ریلیف کا عمل تیز کرنے کی ہدایت کردی گئی ہے۔

وزیراعظم نے این ڈی ایم اے سمیت تمام متعلقہ وزارتوں اور محکموں کو اشتراک عمل کے ساتھ کام کرنے کی ہدایت  کی ہے جبکہ وزیراعظم نے اندرون و بیرون ملک پاکستانیوں، مخیر اداروں اور تنظیموں سے متاثرین کی مدد کے کام میں ہاتھ بٹانے کی اپیل بھی کی ہے۔

شہباز شریف نے کہا کہ بارشوں کا ہے درپے سلسلہ سیلاب کی تباہی میں مزید اضافہ کر رہا ہے ، سیلاب سے لوگوں کا بہت نقصان ہوا ہے اور ان کی مدد ہم سب کا فرض ہے۔