نواز شریف کی جانب سے وطن واپسی سے متعلق مشاورت مکمل کرلی گئی ہے جبکہ عدالت سے رجوع کرنے کا بھی فیصلہ کرلیا گیا ہے۔

اس حوالے سے ذرائع کا کہنا ہے کہ نواز شریف کی اپنی قانونی ٹیم سے وطن واپسی سے متعلق مشاورت مکمل ہوگئی ہے ۔

ذرائع نے بتایا ہے کہ نواز شریف نے وطن واپسی سے قبل اپنی نااہلی، سزائیں اور کیسسز کے حوالے سے عدالت سے رجوع کرنے کا فیصلہ کیا ہے جبکہ مسلم لیگ ن کے قائد نے اپنی قانونی ٹیم کو اس ضمن میں گرین سگنل دے دیا ہے۔

ذرائع نے بتایا کہ نواز شریف کی ہدایات ملنے کے بعد وکلاء کی ٹیم بہت جلد عدالت میں رٹ پیٹیشنز دائر کریں گی، وکلاء عدالت سے نواز شریف کی ضمانت قبل از گرفتاری کے حوالے سے بھی عدالت سے رجوع کریں گے۔

ذرائع نے بتایا کہ نواز شریف کی خواہش ہے کہ وطن واپسی پر جیل نہ جانا پڑے جس کے بعد مسلم لیگ ن کی تنظیم نو اور پارٹی کو سیاسی میدان میں متحرک کریں گے۔

ذرائع نے کہا ہے کہ نواز شریف اس حوالے سے پارٹی کے اہم رہنماوں اور عہدیداران کے ساتھ مسلسل مشاورت اور رابطے میں ہیں۔

خیال رہے کہ پارٹی کی پنجاب میں مایوس کن کارکردگی پر نواز شریف جماعت کے سرکردہ رہنماوں سے ناراض ہیں جبکہ مایوس کن کارکردگی والے اہم رہنماؤں کو انکے عہدوں سے ہٹائے جانے کا بھی امکان ہے۔

نواز شریف وطن واپسی کے بعد عام پارٹی کارکنوں سے ملاقاتوں کا سلسلہ شروع کریں گے جبکہ لاہور اور اسلام آباد کو اپنی سیاسی سرگرمیوں کا مرکز بنائیں گے۔

اسکے علاوہ نواز شریف پارٹی کی تنظیم نو کے سلسلے میں چاروں صوبوں کا بھی دورہ کریں گے جبکہ پارٹی کی تنظیم نو کے لئے مسلم لیگ ن کی نائب صدر مریم نواز بھی پارٹی قائد کے ہمراہ دورے کریں گی۔

یاد رہے کہ نواز شریف کی وطن واپسی کی تیاریوں کے حوالے سے پارٹی کو پہلے سے ہی ہدایات جاری ہو چکی ہیں، نواز شریف پی ڈی ایم اور دیگر جماعتوں کے سربراہوں سے بھی ملاقاتیں کریں گے۔