قطر کو ایوی ایشن  کے شعبے  میں سرمایہ کاری کی پیشکش   کے معاملے پر اہم پیشرفت سامنے آئی ہے۔

ذرائع کے مطابق    سی اے اے حکام نے وزیر اعظم شہباز شریف کو قطر کو کارگو بزنس میں سرمایہ کاری کی بھی پیشکش کرنے کی سفارش کردی۔

وزیر اعظم نے فوری کارگو بزنس کی تفصیلات اور اعداد و شمار مرتب کرکے پریزینٹیشن تیار کرنے کی ہدایت  کردی۔

ذرائع  کا کہنا ہے کہ  ڈی جی سی اے اے سمیت اعلیٰ سی اے اے حکام مسلسل اسلام آباد میں موجو ہیں۔

سی اے اے کراچی ایئر پورٹ کے اعلیٰ حکام کی جانب سے ہفتہ  و اتوار کو دفاتر کھلواکر اعداد شمار حاصل کرلیے گئے۔ کراچی اور لاہور ایئرپورٹ کے پیسنجر اور کارگو بزنس کے اعداد و شمار ڈی جی سی اے اے کو پیش کردیے گئے۔

سی اے اے حکام نے اسلام آباد ایئر پورٹ کے بعد کراچی ایئر پورٹ اور لاہور ایئر پورٹ سے متعلق بھی بریفنگ دےدی۔

ذرائع کا کہنا ہے کہ   دورہ قطر کے دوران ڈی جی سی اے اے، ڈپٹی ڈی جی سی اے اے وزیر اعظم شہباز شریف کے ہمراہ قطری حکام کو بریفنگ  دیں گے۔

ذرائع کامزید کہنا ہے کہ  کراچی ، لاہور  اوراسلام آباد ایئر پورٹس سے کارگو بزنس ماہانہ کتنا ہوتا ہے  اس کی مکمل تفصیلات فراہم کردی گئی ہیں۔

ذرائع کا کہنا ہے کہ گزشتہ تین دن کے دوران تینوں ایئر پورٹس کے حکام سے کارگو بزنس کا ڈیٹا حاصل کرلیا گیا ہے۔

کراچی ایئرپورٹ سے متعلق ایئر پورٹ منیجر عمران خان نے پریزینٹیشن تیار کرکے ڈی جی سی اے اے کے حوالے کردی۔

وزیراعظم دورہ قطر کے دوران اسلام آباد کے بعد لاہور اور کراچی ایئرپورٹس پر بھی قطری حکام کو سرمایہ کاری کی آفر کریں گے۔  اس سے قبل صرف اسلام آباد ایئر پورٹ سے متعلق بات ہوئی تھی۔