وزیر اعلیٰ پنجاب چودھری پرویز الٰہی نے کہا ہے کہ سیلاب سے متاثرہ علاقوں میں ریسکیو اینڈ ریلیف آپریشن کو مزید تیز کیا جائے۔

تفصیلات کے مطابق وزیر اعلیٰ پنجاب چودھری پرویز الٰہی کی زیر صدارت ڈیزاسٹر مینجمنٹ وزارتی کمیٹی کا اجلاس ہوا جس میں راجن پور، تونسہ، ڈیرہ غازی خان جیسے سیلاب متاثرہ علاقوں میں امدادی سرگرمیوں کا جائزہ لیا گیا۔

اجلاس میں سیلاب و بارشوں سے جاں بحق افراد کے لواحقین کے لیے مالی امداد بڑھانے کا فیصلہ ہوا۔

اس موقعے پر چودھری پرویز الٰہی نے چیف سیکرٹری کامران افضل کو آج ہی متاثرہ علاقوں میں جانے کی ہدایت کرتے ہوئے کہا کہ چیف سیکرٹری کامران افضل متاثرین کی بحالی کے کاموں کی خود نگرانی کریں گے، ریسکیو اینڈ ریلیف آپریشن کو مزید تیز کیا جائے، تمام ادارے یکسو ہو کر متاثرین کی مدد کریں۔

ان کا کہنا تھا کہ کوہ سلیمان میں شدید بارشوں کے باعث ندی نالوں میں غیر معمولی پانی آیا، موجودہ صورتحال میں پنجاب حکومت اپنے متاثرہ بہن بھائیوں کی مدد میں کوئی کسر اٹھا نہ رکھے گی۔

وزیراعلیٰ نے جاں بحق افراد کے لواحقین کیلئے مالی امداد میں اضافے کی منظوری دیتے ہوئے کہا کہ گھروں، فصلوں اور مال مویشی کے نقصانات کا ازالہ کریں گے، امدادی کیمپوں میں لوگوں کو بروقت کھانا پہنچایا جائے۔

چودھری پرویز الہی نے کہا کہ امدادی کیمپوں میں موجود افراد کیلئے خشک راشن اورفوڈ ہیمپرز کی فراہمی یقینی بنائی جائے، متاثرہ علاقوں میں وبائی امراض کی روک تھام کیلئے میڈیکل کیمپس کی تعداد میں اضافہ کیا جائے، محکمہ لائیو اسٹاک جانوروں کے لیے چارے کا وافر انتظام کرے۔

ان کا کہنا تھا کہ متاثرین کو امدادی کیمپوں میں ضروری سہولتوں کی فراہمی یقینی بنائی جائے۔

اجلاس میں صوبائی وزراء راجہ محمد بشارت، سید عباس علی شاہ، سردار آصف نکئی، علی افضل ساہی، ڈاکٹراختر ملک، بریگیڈئر (ر) اعجاز شاہ، چیف سیکرٹری کامران افضل اور متعلقہ حکام نے شرکت کی۔