آرمی چیف جنرل قمر جاوید باجوہ نے کہا ہے کہ پاک فوج مشکل وقت میں سیلاب متاثرہ افراد کے ساتھ کھڑی ہے۔

پاک فوج کے شعبہ تعلقات عامہ (آئی ایس پی آر) کے مطابق آرمی چیف جنرل قمر جاوید باجوہ کی جانب سے کور کمانڈر بلوچستان کو ٹیلیفون کیا گیا ہے۔

آئی ایس پی آر نے بتایا ہے کہ اس دوران آرمی چیف نے بلوچستان میں سیلاب کی صورتحال کے متعلق معلومات حاصل کیں ہیں۔

آئی ایس پی آر نے بتایا کہ آرمی چیف نے کہا کہ غیر معمولی بارشوں کی وجہ سے بلوچستان نیں خصوصی طور پر بھاری جانی و مالی نقصان ہوا ہے اور مواصلاتی ڈھانچہ بھی بری طرح متاثر ہوا ہے۔

آئی ایس پی آر نے بتایا کہ آرمی چیف نے ہدایت جاری کرتے ہوئے کہا کہ بلوچستان حکومت کے ریلیف، ریسکیو اور بحالی آپریشن میں فوج سول حکومت کی بھرپور مدد کے لیے تمام تر اقدامات اٹھائیں، ہنگامی بنیادوں پر سول انتظامیہ کی مدد کی جائے۔

آرمی چیف نے ہدایات جاری کی ہیں کہ پاک فوج متاثرہ افراد کی مدد اور مواصلاتی اسٹرکچر کی بحالی کے لیے ہنگامی اقدامات اٹھائے۔

آئی ایس پی آر کے مطابق آرمی چیف نے کہا ہے کہ پاک فوج اس مشکل وقت میں سیلاب متاثرہ افراد کے ساتھ کھڑی ہے، مشکل کی اس گھڑی میں انکی مدد ایک قومی فریضہ ہے۔