بلوچستان میں حالیہ سیلاب کے بعد بھی ہلاکتیں تھم نہ سکیں اور اب مزید 12 افراد جان کی بازی ہار گئے ہیں۔

تفصیلات کے مطابق بلوچستان میں مون سون بارشوں سے ہونے والے نقصانات سے متعلق پی ڈی ایم اے نے رپورٹ جاری کرتے ہوئے کہا کہ صوبے میں 13 جون سے اب تک 322 افراد جاں بحق ہوئے ہیں جن میں 146 مرد، 80 خواتین اور 97 بچے شامل ہیں۔

رپورٹ کے مطابق آج ہونے والی ہلاکتیں بلوچستان کے اضلاع بارکھان اور کچھی میں ہوئیں۔

پی ڈی ایم اے کی رپورٹ میں کہا گیا ہے کہ حالیہ بارشوں سے صوبے کے 32 اضلاع شدید متاثر ہوئے ہیں، صوبے میں بارشوں سے زخمی ہونے والوں کی تعداد 186 ہو گئی ہے۔

پی ڈی ایم اے بلوچستان کی رپورٹ کے مطابق حالیہ سیلاب سے 20 ہزار 27 مکانات منہدم اور 52 ہزار 208 مکانات کو جزوی نقصان پہنچا اور سیلابی صورتحال سے 24 پلوں اور 2 ہزار کلو میٹر سے زائد شاہراہ متاثر ہوئی۔

رپورٹ میں مزید کہا گیا کہ بلوچستان میں بارشوں اور سیلاب سے 5 لاکھ کے قریب مویشی ہلاک ہوئے ہیں۔