ضمنی انتخاب کی مہم میں ضابطہ اخلاق کی خلاف ورزی کے معاملے پر کیس کی سماعت 29 ستمبر تک ملتوی کردی گئی ہے۔

تفصیلات کے مطابق الیکشن کمیشن میں ضمنی انتخاب کی مہم میں ضابطہ اخلاق کی خلاف ورزی اور سرکاری مشینری کے استعمال کے معاملے پر عمران خان اور وزیر اعلیٰ کے پی محمود خان کے خلاف نوٹسز کی سماعت آج ہوئی۔

کیس کی سماعت ممبر سندھ نثار درانی کی سربراہی میں چار رکنی کمیشن نے کی جس دوران وکیل وزیراعلیٰ کے پی پیش ہوئے اور بتایا کہ اسی معاملہ پر ڈسٹرکٹ مانیٹرنگ آفیسر چارسدہ نے بھی نوٹس جاری کیا ہے، یک وقت میں دو فورمز پر سماعت کیسے ہو سکتی ہے۔

الیکن کمیشن کے ممبر بلوچستان نے بتایا ہے کہ ہم نے مجموعی طور پر مختلف حلقوں میں خلاف ورزیوں پر نوٹس جاری کیے ہیں، سرکاری مشینری اور ہیلی کاپٹر کا بے دریغ استعمال کیا گیا ہے اور تمام صوبائی سرکاری مشینری وزیر اعلیٰ کے ہاتھ میں ہے۔

اس موقع پر اسپیشل سیکریٹری الیکشن کمیشن نے بتایا کہ یہ کیس جوائنٹ صوبائی الیکشن کمیشنر نے بھجوایا ہے۔

الیکشن کمیشن نے کہا ہے کہ عمران خان کی جانب سے کسی کے پیش نہ ہونے پر دوبارہ نوٹس بھجوایا جائے جس کے بعد عمران خان اور محمود خان کے خلاف کیس کی سماعت 29 ستمبر تک ملتوی کردی گئی ہے۔