پاکستان بھر میں سیلاب سے متاثرہ افراد کی مدد کے لئے تمام دوست ممالک کی جانب سے امداد کا سلسلہ جاری ہے۔

دوست ممالک کی جانب سے جاری امدادی سلسلے کے متعلق ترجمان دفتر خارجہ کی جانب سے بھیجی جانے والی امداد کی تفصیل جای کی گئی ہے۔

ترجمان دفتر خارجہ کے مطابق پاکستانی سیلاب متاثرین کے لیے 13 ممالک، 3 عالمی تنظیموں سے 110 امدادی طیارے پہنچ چکے ہیں جس میں متحدہ عرب امارات نے سب سے زیادہ 41 امدادی طیارے راولپنڈی، کراچی اور لاہور بھیجے ہیں۔

اسکے علاوہ امریکہ نے سیلاب متاثرین کے لیے 20 امدادی طیارے سکھر، کراچی راولپنڈی بھیجے ہیں جبکہ ترکیہ نے سیلاب متاثرین کے لیے 13 طیارے امداد کراچی، راولپنڈی بھیجے ہیں۔

ترجمان نے بتایا کہ چین اور قطر سے 4، 4 امدادی طیارے پاکستان آئے جبکہ سعودی عرب، عمان سے متاثرین سیلاب کے لیے امداد لے کر 2، 2 طیارے پاکستان پہنچ چکے ہیں۔

ترجمان کا کہنا تھا کہ ازبکستان، فرانس، ترکمانستان، اردن، نیپال، برطانیہ سے ایک ایک امدادی طیارہ پاکستان پہنچا ہے جبکہ یونیسف نے 2، اقوام متحدہ ادارہ مہاجرین نے 13، عالمی ادارہ خوراک نے 3 امدادی طیارے بھیجے ہیں۔

خیال رہے کہ اسی تسلسل کو جاری رکھتے ہوئے آج امریکہ کی تیسری پرواز امدادی امداد لے کر کراچی کے جناح انٹرنیشنل ایئرپورٹ پر اتری۔

اس حوالے سے دفتر خارجہ کے ترجمان عاصم افتخار نے کہا کہ امریکہ کی جانب سے انسانی ہمدردی کی بنیاد پر امداد کا گرمجوشی اور تشکر کے ساتھ خیرمقدم کیا جاتا ہے۔