الیکشن کمیشن آف پاکستان کی جانب سے پی ٹی آئی فارن فنڈنگ کیس کی سماعت 6 نومبر تک ملتوی کردی گئی ہے۔

تفصیلات کے مطابق الیکشن کمیشن میں آج پی ٹی آئی فارن فنڈنگ کیس کی سماعت ہوئی جس میں پی ٹی آئی کی جانب سے پی ٹی آئی کے وکیل شاہ خاور پیش  ہوئے۔

انہوں نے کمیشن کے سامنے پیش ہوکر مزید مہلت مانگی  اور بتایا کہ دس سال پرانا کیس ہے  بیرون ملک چیپٹر سے تفصیلات اکھٹی کرنی ہے جس کے لئے ہمیں کم از کم 8 ہفتے درکار ہیں۔

اںہوں نے بتایا کہ لوگوں نے بیان دیا ہے کہ وہ پاکستانی شہری ہیں ، فیصلے میں انھیں غیر ملکی ظاہر کیا گیا تھا ۔

اس موقع پر چیف الیکشن کمشنر  کا کہنا تھا کہ آپ سے تو ہمارا سوال تھا کہ ہم رقم ضبط کیوں نہ کر لیں، اپ کو اس پر جواب دینا ہے اور ہمارے قانون کے مطابق غیر ملکی کمپنی سے پیسے نہیں آ سکتے ۔

انہوں نے کہا کہ  پہلے ہی بہت وقت لگ گیا ہے  لیکن پھر بھی آپ کو چار ہفتے کی مہلت دے رہے ہیں جس پر شاہ خاور  نے چھ ہفتے کی مہلت کی درخواست کی تو چیف الیکشن کمشنر نے اس کی منظوری دیتے ہوئے سماعت کو 6 نومبر تک ملتوی کردیا ہے۔