لاہور: صوبائی وزیر تعلیم پنجاب مراد راس کا کہنا ہے کہ عوام کو ہر ممکن سہولیات فراہم کرنے کیلئے اقدامات کررہے ہیں۔

وزیر تعلیم مراد راس کی صوبائی وزراء، پارٹی ایم پی ایز و دیگر سیاسی قائدین سے مرحلہ وار ملاقاتیں ہوئیں، جس کا انعقاد 90 شاہراہ قائد اعظم مال روڈ پر کیا گیا۔

ملاقاتوں کے انعقاد کا بنیادی مقصد صوبے بھر میں تعلیمی مسائل کے حوالے آگاہی حاصل کرنا تھا۔

مراد راس نے بتایا کہ صوبائی وزراء، ایم پی ایز و دیگر نے اپنے اپنے حلقوں میں درپیش تعلیمی مسائل کے حوالے آگاہ کیا۔

‘مسائل کی نشاندہی کے بغیر اُن کا مستقل بنیادوں پر حل ممکن نہیں’

اس موقع پر مراد راس نے کہا کہ مسائل کی نشاندہی کے بغیر اُن کا مستقل بنیادوں پر حل ممکن نہیں، ہمارے بچے ملک کا مستقبل ہیں، بہتر سے بہتر تعلیمی سہولیات فراہم کرنے کیلئے کام کر رہے ہیں۔

انہوں نے کہا کہ آج محکمہ اسکول ایجوکیشن پنجاب ٹیکنالوجی کے مُثبت اور جامع استعمال کی بدولت ترقی کے راستے پر ہے، میں دعوے سے کہتا ہوں کہ ٹیکنالوجی کا جتنا موثر استعمال محکمہ تعلیم پنجاب نے گزشتہ چند سالوں میں کیا کسی اور نے نہیں کیا۔

‘لوگوں کی مشکلات کم کرنے کیلئے پنجاب حکومت یک مُشت محنت کررہی ہے’

صوبائی وزیر نے کہا کہ عوام کو ہر ممکن سہولیات فراہم کرنے کے لیے اقدامات کر رہے ہیں، لوگوں کی مشکلات کم کرنے کیلئے پنجاب حکومت دن رات یک مُشت محنت کر رہی ہے۔

انکا کہنا ہے کہ سیاسی مخالفین نے حکومت سنبھالنے سے لے کر اب تک عوام کو مخض مشکلات سے دو چار کیا ہے، امپورٹڈ حکومت کو عوام پر مہنگائی کی صورت میں بمباری کرتے ہوئے ذرا برابر بھی ترس نہیں آیا۔

مراد راس نے مزید کہا کہ ذاتی مفادات کی بنیادوں پر سیاست کرنے والے کبھی مُلکی مفاد کا نہیں سوچ سکتے، چئیرمین تحریک انصاف عمران خان کے عوامی خدمت کے ویژن کو لے کر آگے بڑھ رہے ہیں۔