پرویزالہٰی نے کہا ہے کہ سیلاب زدگان کی مدد کیلئے آگے آنے والے افراد کا جذبہ قابل قدر ہے۔

 تفصیلات کے مطابق وزیر اعلیٰ پنجاب چودھری پرویزالہٰی سے سیالکوٹ کی معروف سیاسی و کاروباری شخصیات کی ملاقات ہوئی ہے۔

ملاقات میں سیالکوٹ کی سیاسی و کاروباری شخصیات نے وزیراعلیٰ چودھری پرویز الہٰی کووزیراعلیٰ فلڈ ریلیف فنڈ میں اڑھائی کروڑ کے چیک دیئے۔

سیالکوٹ انٹرنیشنل ایئر پورٹ لمیٹڈ کی جانب سے 2کروڑ روپے کا چیک دیا گیا جبکہ قیصر بریار نے بھی وزیراعلیٰ فلڈر یلیف فنڈ میں 50لاکھ روپے کا چیک دیا ہے۔

اس موقع پر چودھری پرویز الہٰی کا کہنا تھا کہ سیلاب زدگان کی بحالی کیلئے وزیراعلیٰ فلڈ ریلیف فنڈ میں مخیر حضرات کا تعاون لائق تحسین ہے جبکہ سیلا ب زدگان کی مدد کیلئے آگے آنے والے افراد کا جذبہ قابل قدر ہے۔

ان کا یہ بھی کہنا تھا کہ وزیراعلیٰ فلڈ ریلیف فنڈ میں جمع ہونے والی پائی پائی سیلاب زدگان کی آباد کاری پر خرچ کی جائے گی۔

وزیر اعلیٰ پنجاب چودھری پرویزالہٰی کا مزید کہنا تھا کہ فنڈز کی شفاف تقسیم کیلئے مانیٹرنگ کا موثر نظام وضع کیا ہے، وزیر اعلیٰ فلڈ ریلیف فنڈ میں جمع ہونے والی رقم اصل حقدار تک پہنچائیں گے۔

وزیراعلیٰ پنجاب سے ملاقات کرنیوالوں میں عثمان ڈار،قیصر بریار،سلیم بریار،چودھری اخلاق،علی اسجد ملہی،خواجہ مسعود،سرفراز بھٹی،حسن خاور،مارکیٹ کمیٹی کے ضیاء چودھری، صوبائی مشیر عامر سعیدراں اور پرنسپل سیکرٹری وزیراعلیٰ محمد خان بھٹی بھی شامل تھے۔