پاکستان آرمی سندھ میں فلڈ ریلیف کے ساتھ شاہراہوں کو کلیئر کرانے میں بھی مصروف ہے۔

تفصیلات کے مطابق سیلاب کی تباہ کاریوں کے سبب قومی شاہراہ پر بدترین ٹریفک جام آخر کار پاک آرمی کی انتھک کاوشوں سے بحال ہو گیا، پاکستان آرمی سندھ میں فلڈ ریلیف کے ساتھ شاہراہوں کو کلیئر کرانے میں بھی مصروف ہے۔

کنڈیارو اور ہیلانی کے درمیان کئی گھنٹوں سے بند قومی شاہراہ کو پاکستان آرمی کی کوشش سے کھول دیا گیا ہے، قومی شاھراہ  ٹرکس اور دیگر ٹریفک کی طویل قطاروں کی وجہ سے بند تھی۔

پاکستان آرمی نے فوری اقدام اٹھایا اور خراب گاڑیوں کی ہنگامی بنیادوں پر مرمت کر کے ٹریفک بحال کیا۔

پاک فوج گاڑیوں کے مکینکس اور الیکٹریشنز کے ہمراہ قومی شاہراہ پر مسلسل کام میں مصروف رہے اور ٹریفک کی روانی بحال کی۔

پاکستان آرمی نے ہائی وے پولیس کے ساتھ مل کر ٹریفک کو معمول کے مطابق رواں دواں کیا۔

قومی شاہراہ کے بحال ہونے پر پھنسے مسافر اور مزدور اپنی اپنی منزل کو روانہ ہوئے اور پاک فوج کا شکریہ ادا کیا۔

واضح رہے کہ مذکورہ قومی شاہراہ پر سے دو لاکھ گاڑیاں روزانہ گزرتی ہیں، قومی شاہراہ حالیہ سیلاب اور بارشوں کے سبب تباہ حال ہے۔