وزیراعلیٰ پنجاب چوہدری پرویزالہیٰ کا کہنا ہے کہ ترقیاتی منصوبوں کی بروقت تکمیل کیلئے جامع ایکشن پلان بنالیا ہے۔

وزیراعلیٰ پرویزالہیٰ سے ایم پی اے سعید احمد سیدی، سابق ایم این چوہدری اشفاق اور چیف ایگزیکٹو آفیسر چن ون کاشف اشفاق کی ملاقات ہوئی جس میں ترقیاتی منصوبوں اور عمومی صورتحال پر تبادلہ خیال کیا گیا۔

‘ترقیاتی منصوبوں میں شفافیت اور معیار یقینی بنانے کیلئے مانیٹرنگ کی جائیگی’

چوہدری پرویزالہیٰ نے کہا کہ ترقیاتی منصوبوں کی بروقت تکمیل کیلئے جامع ایکشن پلان بنایا ہے، سیکرٹریز کی کارکردگی کو ترقیاتی منصوبوں کی بروقت تکمیل سے لنک کیا ہے، منصوبوں کو مقرر کردہ مدت میں مکمل کرنے کے لئے مانیٹرنگ کا موثر نظام وضع کیا ہے۔

انہوں نے کہا کہ وزیر اعلیٰ آفس سے ڈویلپمنٹ پراجیکٹس پر ہونے والی پیشرفت کی نگرانی کی جائے گی، ڈویلپمنٹ پراجیکٹس پر پیش رفت کا خود باقاعدگی سے جائزہ لوں گا۔

وزیراعلیٰ پنجاب نے مزید کہا کہ ترقیاتی منصوبوں میں شفافیت اورمعیار یقینی بنانے کے لئے ہر سطح پر مانیٹرنگ کی جائے گی اور ٹوبہ ٹیک سنگھ سمیت صوبہ بھر کے کاشتکاروں کے آبپاشی سے متعلق مسائل حل کیے جائیں گے۔

واضح رہے کہ سابق پرنسپل سیکرٹری وزیر اعلیٰ جی ایم سکندر بھی اس موقع پر موجود تھے۔

پاکستان کے ترقیاتی منصوبوں کیلئے حاصل کیے گئے قرض کی تفصیلات سامنے آگئیں

پاکستان کے  مختلف ممالک سے ترقیاتی منصوبوں  کے لیے حاصل کیے گئے قرض کی تفصیلات سامنے آگئی ہیں۔

تفصیلات کے مطابق بول نیوز کے کانٹینٹ سیل نے پاکستان کے 11 ممالک سے جاری ترقیاتی منصوبوں کے لیے حاصل کیے گئے قرض کی تفصیلات حاصل کرلیں۔

دستاویزات کے مطابق پاکستان نے 11 ممالک سے 101 جاری ترقیاتی منصوبوں کے لیے 10 ارب 82 کروڑ 58 لاکھ  17 ہزار ڈالر کا قرض لیا۔

11 ملکوں میں چین ،برطانیہ،امریکہ،فرانس،سعودی عرب،جاپان ،جرمنی،جنوبی کوریا،اٹلی ،کویت اور عمان شامل ہیں ۔

پاکستان نے جاری ترقیاتی منصوں کے لیے سب سے زیادہ قرض چین سے لیا۔ چین نے 13 جاری ترقیاتی منصوبوں کے لیے 6 ارب 29 کروڑ 16 لاکھ ڈالر قرض دیا۔

برطانیہ سے 3 جاری ترقیاتی منصوبوں کے لیے ایک ارب 3 کروڑ 23 لاکھ 30 ہزار ڈالر قرض لیا گیا۔امریکہ سے 12 جاری ترقیاتی منصوبوں کے لیے ایک ارب 13 لاکھ 39 ہزار ڈالر قرض لیا گیا۔

فرانس سے 14 جاری ترقیاتی منصوبوں کے لیے 64 کروڑ 65 لاکھ 40 ہزار ڈالر ،سعودی عرب سے 13 جاری ترقیاتی منصوبوں کے لیے 63 کروڑ 36 لاکھ ڈالر اور جاپان سے  2 جاری ترقیاتی منصوبوں کے لیے  3 کروڑ 33 لاکھ 10 ہزار ڈالر قرض لیا گیا۔

دستاویزات کے مطابق جرمنی سے 28 جاری ترقیاتی منصوبوں کے لیے 48 کروڑ 20 لاکھ 10 ہزار ڈالر،جنوبی کوریا سے 10 جاری ترقیاتی منصوبوں کے لیے 53 کروڑ 75 لاکھ 21 ہزار ڈالر قرض لیا گیا۔