پاکستان تحریک انصاف کے رہنما مراد سعید نے کہا ہے کہ سب کا نشانہ ایک ہی ہے اور وہ عمران خان ہے۔

تفصیلات کے مطابق مراد سعید نے ایف نائن پارک میں خطاب کرتے ہوئے کہا کہ سازش کے تحت عمران خان کی منتخب حکومت کو ہٹایا گیا، اب عمران خان کو مائنس کرنے کی کوشش ہو رہی ہے، ایسی کوشش کرنے والوں کو ایک ہی پیغام ہے اور وہ پیغام ایبسلوٹیلی ناٹ ہے۔

مراد سعید نے کہا کہ ہمارے پارٹی کے تین سینئر راہنماوں کو کون بلاتا رہا؟ یہاں پر خرید و فروخت کی منڈی لگی ہوئی ہے۔

ان کا کہنا تھا کہ ہم ہر موقعے پر عمران خان کے ساتھ کھڑے ہیں۔

انہوں نے کہا کہ سب کا نشانہ ایک ہی ہے اور وہ عمران خان ہے، عمران خان کی زندگی کو شدید خطرہ ہے۔

مراد سعید نے کہا کہ بنی گالہ کے اطراف میں جو سازشیں کی اس کی بھی تفصیلات ہیں، جو عمران خان کو ختم کرنا چاہتے ہیں اس کا بھی معلوم ہے، اگر عمران خان کا بال بھی بیکا ہوا تو قوم آپ کو نہیں چھوڑے گی، عمران خان ہماری ریڈ لائن ہے، ایک عمران خان اور دوسری طرف امریکی غلام اور قوم کے بھکاری ہیں۔