حضرت علی ہجویری داتا گنج بخشؒ کے مزار کی اپ گریڈیشن کا اصولی فیصلہ کرلیا گیا ہے۔

وزیراعلیٰ پنجاب چوہدری پرویز الٰہی کی زیر صدارت  ایک اعلیٰ سطح کا اجلاس ہوا جس میں حضرت علی ہجویری داتا گنج بخشؒ کے مزار کے اردگرد برآمدے میں توسیع کے منصوبے کی منظوری دے دی گئی۔

اجلاس میں مزار داتا گنج بخشؒ کمپلیکس کے اردگرد تجاوزات اور ناجائز قبضے ختم کرانے کیلئے کارروائی کا بھی حکم دیا گیا۔

اجلاس کے دوران مزار داتا گنج بخشؒ کے قریب عمودی پارکنگ پلازہ بنانے کی تجویز پر بھی غور کیا گیا اور مزار کمپلیکس کے سامنے سڑک عبور کرنے والے زائرین کیلئے انڈرگراؤنڈ یا اوورہیڈبرج بنانے کی تجاویز کا جائزہ بھی لیا گیا۔

‘مزار داتا گنج بخشؒ کی توسیع سے زائرین کو سہولت ملے گی’

وزیراعلیٰ پنجاب نے اجلاس میں گفتگو کرتے ہوئے کہا کہ مزار کے احاطے میں زائرین کے لئے خود کار چھتریاں نصب کی جائیں گی، گرمی کے موسم میں ہزاروں زائرین صحن میں چھتریوں کے سائے تلے بیٹھ سکیں گے۔

پرویزالہیٰ نے مزید کہا کہ مزار داتا گنج بخشؒ کی توسیع سے زائرین کو سہولت ملے گی۔ انڈرگراؤنڈ پارکنگ کو محفوظ بنانے کیلئے ایکسپلسوڈی ٹیکٹو نصب کیے جائیں گے۔

وزیراعلیٰ پنجاب پرویزالہیٰ نے اجلاس میں مزار کمپلیکس کیلئے بوسیدہ واٹر سپلائی تبدیل کرنے کی ہدایت بھی  دی ہے۔

واضح رہے کی اس اہم اجلاس میں ایم پی اے حافظ عمار یاسر، صوبائی مشیر عامر سعید، پرنسپل سیکرٹری اور وزیراعلیٰ محمد خان بھٹی، کمشنرلاہور ڈویژن، متعلقہ سیکرٹریز اور نیسپاک حکام شریک ہوئے۔

اسکے علاوہ میاں حنیف، میاں رشید، اسلم ترین، داتا دربار امور کے چیئرمین، داتا دربار امور کے ممبران چودھری علی اقبال، سجاد احمد، میاں عمران، شیخ امین، آصف منیر قادری بھی اجلاس کا حصہ تھے۔

حضرت داتا گنج بخشؒ