سیکٹری جنرل پاکستان تحریک انصاف اسد عمر نے کہا ہے کہ قوم اور کپتان کسی صورت بھی پیچھے ہٹنے کو تیار نہیں۔

تفصیلات کے مطابق سیکٹری جنرل پاکستان تحریک انصاف اسد عمر نے بنی گالا کے باہر میڈیا سے گفتگو کرتے ہوئے کہا کہ آج الیکشن کمیشن کا فیصلہ غیر متوقع فیصلہ نہیں ہے، الیکشن کمیشن پی ڈی ایم کا سیاسی حلیف ہے اور پی ٹی آئی کا سیاسی حریف ہے۔

اسد عمر نے کہا کہ ساڑھے 6 مہینے پہلے سازش کر کے پاکستان کے منتخب وزیر اعظم کو عہدے سے ہٹایا، انہوں نے سوچا تھا قوم قبول کر لے گی اور عوام گھر بیٹھ جائے گی، عوام نے یہ فیصلہ تسلیم نہیں کیا۔

ان کا کہنا تھا کہ قوم اور کپتان پیچھے ہٹنے کو تیار نہیں، ہم نے پاکستان کی تاریخ کے سب سے بڑے جلسے کیے، ان کو واضح ہو گیا ہے کہ یہ سیاسی طور پر عمران خان کا مقابلہ نہیں کر سکتے اس لیے الیکشن کمیشن سے یہ فیصلہ کروایا گیا، یہ کیس ہی نہیں بنتا، اس وقت توشہ خانہ ریفرنس آصف علی زرداری اور نواز شریف کے خلاف بھی موجود ہے۔

انہوں نے کہا کہ عمران خان نے آئین اور قانون کی پاسداری کی، اس فیصلے کو عدالت میں چیلنج کیا جائے، جیسے ہی تفصیلی فیصلہ آئے گا ہم فورا اسلام آباد ہائیکورٹ پہنچیں گے، قوم نے اس فیصلے کو مسترد کر دیا، اس قوم کو دیوار کے ساتھ نہ لگاؤ، کپتان اور قوم نے بہت برداشت کا مظاہرہ کیا ہے، بات اس نہج تک نہ پہنچ جائے جہاں معاملہ کنٹرول سے نکل جائے۔

اسد عمر نے مزید کہا کہ قوم کے مینڈیٹ کو بیرونی مداخلت کے زریعے دبانے کی کوشش کی جا رہی ہے، قوم دو ٹوک الفاظ میں کہہ رہی ہے غلامی نا منظور۔

واضح رہے کہ الیکشن کمیشن آف پاکستان کی جانب سے توشہ خانہ ریفرنس میں عمران خان کو نااہل قرار دے دیا گیا ہے۔