پاکستان تحریک انصاف کے لانگ مارچ کے سلسلے میں مذاکرات کے لئے وزیراعظم کی جانب سے کمیٹی تشکیل دے دی گئی ہے۔

وزیراعظم نے کہا کہ کمیٹی امن و امان برقرار رکھنے اور لانگ مارچ کے حوالے سے سیاسی مذاکرات کے لیے قائم کی گئی ہے۔

اسکے علاوہ کمیٹی لانگ مارچ سے متعلق مذاکرات کے معاملے سے وزیر اعظم کو آگاہ رکھے گی۔

اس حوالے سے وزیراعظم نے کہا کہ امن و امان پر کوئی سمجھوتہ نہیں ہوگا مگر مذاکرات کے لئے دروازے ہمیشہ سے کھلے ہیں۔

وزیراعظم شہباز شریف نے کہا کہ ہم جمہوری لوگ ہیں اور بات کرنے کو تیار ہیں لیکن کسی کو قانون ہاتھ میں نہیں لینے دیں گے۔

کمیٹی نو ارکان پر مشتمل ہے اور وزیر داخلہ رانا ثناء اللہ خان اس کی قیادت کریں گے۔

خیال رہے کہ کمیٹی میں مسلم لیگ ن کے ایاز صادق، خواجہ سعد رفیق، مریم اورنگزیب، پیپلز پارٹی کے قمر زمان کائرہ، ایم کیو ایم کے خالد مقبول، اے این پی کے میاں افتخار حسین اور جے یو آئی ف کے مولانا اسد شامل ہیں۔

کمیٹی کے سربراہ وزیر داخلہ رانا ثناء اللہ نے کہا ہے کہ لانگ مارچ کے حوالے سے مذاکرات کے لئے بنائی جانے والے کمیٹی میں پیپلزپارٹی کے رہنما بھی شامل ہیں۔

انہوں نے کہا کہ ہم پی ٹی آئی کے ساتھ بات کرنے کے لیے تیار ہیں اور پی ٹی آئی الیکشن کے حوالے سے بات کرنا چاہتی ہے تو مذاکرات کا پہلا دور شروع کریں گے۔

انہوں نے مزید کہا کہ ہم پر کوئی پریشر نہیں ہے، ہم ملک میں استحکام کے لیے بیٹھنا چاہتے ہیں تاہمپی ٹی آئی لیڈر شپ اپنے موزوں بندے مذاکرات کے لیے بھیجیں ۔