ترجمان وزیر اعلیٰ پنجاب فیاض الحسن چوہان نے کہا ہے کہ کانٹے دار مقابلے کا خواب دیکھنے والے اب آنکھیں مل رہے ہیں۔

تفصیلات کے مطابق ترجمان وزیر اعلیٰ پنجاب نے ضمنی الیکشن کے نتائج کے حوالے سے بیان دیتے ہوئے کہا کہ ضمنی الیکشن میں شکست فاش امپورٹڈ حکومت کے مقدر میں لکھ دی گئی ہے۔

فیاض چوہان نے کہا کہ اے این پی کی سرخ ٹوپی، مولانا کا جھنڈا اور ن لیگ کی بریانی والوں کے حصے میں رسوائی اور جگ ہنسائی کے سوا کچھ نہیں آئے گا۔

ان کا کہنا تھا کہ تیرہ رنگی حکومت کو اپنے گھروں سے کسی نے ووٹ نہیں ڈالا، کانٹے دار مقابلے کا خواب دیکھنے والے اب آنکھیں مل رہے ہیں۔

انہوں نے کہا کہ حقیقی آزادی کا راستہ روکنا مشکل ہی نہیں نا ممکن ہو چکا ہے، عوام ان نالائقوں، نکموں، نکھٹوؤں اور نا اہلوں سے چن چن کر بدلے لے رہی ہے۔

واضح رہے کہ قومی اسمبلی کے 8 اور پنجاب اسمبلی کے 3 حلقوں میں پولنگ کا وقت ختم ہوگیا ہے جبکہ ووٹوں کی گنتی کا عمل جاری ہے۔