امیر تحریک لبیک پاکستان سعد حسین رضوی نے کہا ہے کہ عمران خان کا گھسا پٹا بیانیہ بہت جلد دفن ہونے والا ہے۔

تفصیلات کے مطابق امیر تحریک لبیک پاکستان حافظ سعد حسین رضوی نے ملک کی موجودہ سیاسی صورتحال پر بیان دیتے ہوئے کہا کہ اقتدار کی نورا کشتی میں ملک کو نقصان پہنچایا جا رہا ہے، لندن میں بیٹھا نااہل اور بھگوڑا سزا یافتہ مجرم ملکی فیصلے کرنے کا حق نہیں رکھتا۔

ان کا کہنا تھا کہ کرپٹ اور ملکی خزانوں کو لوٹ کر جائیداد بنانے والوں کو فوری ریلیف ملنا غریب آدمی کے زخموں پر نمک چھڑکنے کے مترادف ہے، لاکھ سے زیادہ مقدمات ملک بھر کی عدالتوں میں زیر التوا ہیں۔

انہوں نے کہا کہ غریب اور امیر کے لئے الگ نظام انصاف کا سسٹم معاشرے میں بگاڑ کی وجہ بنا ہوا ہے، عمران خان کو لعن طعن، برائی، الزامات کے سوا کچھ نہیں آتا۔

سعد رضوی نے کہا کہ عمران خان کا گھسا پٹا بیانیہ بہت جلد دفن ہونے والا ہے، سیاستدانوں کے پاس نوجوان نسل کو قائل کرنے کیلئے اب کچھ نہیں بچا۔

ان کا کہنا تھا کہ عوامی طاقت سے اسلام، پاکستان اور عوام کے منشور کو گھر گھر پہنچائیں گے، چلے ہوئے کارتوس اب ناکارہ اور زنگ آلودہ ہو چکے ہیں۔