وفاقی وزیر انفارمیشن ٹیکنالوجی سید امین الحق نے کہا ہے کہ پاکستانی اسٹارٹ اپس کی اس وقت مجموعی حیثیت ساڑھے 3 ارب ڈالرز تک پہنچ چکی ہے۔

تفصیلات کے مطابق گلف انفارمیشن ٹیکنالوجی نمائش میں  پاکستانی اسٹالز توجہ کا مرکز رہے۔

دبئی میں منعقدہ گلف انفارمیشن ٹیکنالوجی نمائش میں 53 سے زائد پاکستانی آئی ٹی کمپنیوں نے شرکت کی جبکہ وفاقی وزیر انفارمیشن ٹیکنالوجی سید امین الحق نے نمائش میں پاکستانی پویلین کا افتتاح کیا۔

اس موقع پر بات چیت کرتے ہوئے انہوں نے کہا کہ پاکستانی اسٹارٹ اپس میں سرمایہ کاری میں گزشتہ 4 برسوں میں 30 گنا اضافہ ہوا ہے۔

وفاقی وزیر انفارمیشن ٹیکنالوجی سید امین الحق کا کہنا تھا کہ سال 2017،اسٹارٹ اپس میں سرمایہ کاری 10 ملین ڈالرز ،2021 میں 373 ملین ڈالر رہی۔

انہوں نے کہا کہ عالمی وینچرز اور اینجلز کی اسٹارٹ اپس میں سرمایہ کاری پاکستانی پالیسیوں پر اعتماد کا ثبوت ہے جبکہ  پاکستانی اسٹارٹ اپس کی اس وقت مجموعی حیثیت ساڑھے 3 ارب ڈالرز تک پہنچ چکی ہے۔

 امین الحق کا مزید کہنا تھا کہ اسٹارٹ اپس کی مجموعی حیثیت 2027 تک 20 ارب ڈالرز تک پہنچانے کی راہ ہموار کردی ہے۔

اسکے علاوہ سید امین الحق نے ہواوے، سمیت عالمی ٹیکنالوجی کمپنیوں کے وفود، کامیاب ترین اسٹارٹ اپس سے ملاقاتیں بھی کیں۔