الیکشن کمیشن آف پاکستان کی جانب سے توہین الیکشن کمیشن اور چیف الیکشن کمشنر کیس کیس کی سماعت 10 نومبر تک ملتوی کردی گئی ہے۔

تفصیلات کے مطابق عمران خان، اسد عمر، اور فواد چوہدری کے خلاف توہین الیکشن کمیشن اور چیف الیکشن کمشنر کی سماعت آج ہوئی جس میں پی ٹی آئی  کی جانب سے انور منصور پیش ہوئے۔

دوران سماعت انور منصور نے بتایا کہ اس کیس میں منفی ایکشن مسئلہ ہے اور نوٹس سیکریٹری الیکشن کمیشن نے جاری کیے ہیں لیکن الیکشن کمیشن نے نہیں۔

انہوں نے کہا کہ جب تک یہ مسئلہ حل نہ ہو تب تک یہ شو کاز نوٹس غیر قانونی ہے اور شوکاز نوٹس  پر  بھی ڈی جی لاء کے دستخط ہیں۔

انہوں نے کہا کہ ہماری ہائی کورٹ میں 31 اکتوبر کو سماعت ہے اس کے بعد کی تاریخ مقرر کی جائے۔

اس موقع پر ممبر نثار درانی نے کہا کہ الیکشن کمیشن نے نوٹس جاری کیے ہے، سیکریٹری کی طرف سے نوٹس نہیں دیا گیا  ہے انھوں نے صرف اطلاع دی ہے۔

انہوں نے بتایا کہ سیکریٹری الیکشن کمیشن نے نوٹس جاری کیا جس کے بعد ہم نے سماعت کرکے  شو کاز نوٹس  ہم نے جاری کیا ہے۔

انور منصور نے بتایا کہ اسد عمر میرے ساتھ ا رہے تھے لیکن رات کو دھمکی آمیز کال آئی اور ان کے پاس سیکیورٹی نہیں ہے۔

ممبر نثار درانی نے کہا کہ ہمارے پاس 10 نومبر  کے بعد کوئی راستہ نہیں بچے گا کہ چارج فریم کر دیں گے جس پر انور منصور نے کہا کہ الیکشن کمیشن کورٹ نہیں ہے۔

 بعدازاں الیکشن کمیشن نے کیس کی سماعت 10 نومبر تک ملتوی کردی۔