ڈاکٹر یاسمین راشد نے کہا ہے کہ عمران خان ظلم کی حکومت کے خلاف لانگ مارچ کرنے جارہے ہیں۔

تفصیلات کے مطابق صوبائی وزیر صحت وصدر پی ٹی آئی سنٹرل پنجاب ڈاکٹر یاسمین راشد نے کنٹینر پر پی ٹی آئی دفترجیل روڈ سے لبرٹی چوک کا دورہ کیا ہے۔

        ڈاکٹر یاسمین راشد نے اجلاس کی صدارت کے دوران لانگ مارچ کی تیاریوں کا بھی تفصیلی جائزہ لیا جبکہ شہریوں نے ان کا والہانہ استقبال بھی کیا۔

اس موقع پر صوبائی وزیر صحت وصدر پی ٹی آئی سنٹرل پنجاب ڈاکٹر یاسمین راشد نے اپنا اظہار خیال کرتے ہوئے کہا کہ لانگ مارچ کی تیاریوں کوحتمی شکل دی جارہی ہے، عمران خان نے جمعہ کو لانگ مارچ کرنے کا اصولی فیصلہ کیا ہے۔

انہوں نے کہا کہ عمران خان ظلم کی حکومت کے خلاف لانگ مارچ کرنے جارہے ہیں جبکہ جمعہ کو عمران خان کی قیادت میں پوری قوم بھی امپورٹڈ حکومت کے خلاف لانگ مارچ میں حصہ لے گی۔

ان کا کہنا تھا کہ لاہورسے اسلام آباد پاکستان تحریک انصاف کے کارکنان لانگ مارچ میں بھرپورشرکت کریں گے۔

ڈاکٹر یاسمین راشد نے کہا کہ عمران خان اسلام آباد حق کی آواز بلند کرنے لانگ مارچ کرنے جارہے ہیں، انشاء اللہ لانگ مارچ کو کامیاب بنائیں گے۔

انہوں نے کہا کہ  جمعہ کو عمران خان کے ساتھ عوام کا سمندر ہوگا، وفاقی حکومت عوام کے سمندرکونہیں روک پائے گی جبکہ عمران خان کے اسلام آباد پہنچتے ہی وفاقی حکومت ریزہ ریزہ ہو جائے گی۔

ان کا کہنا تھا کہ رانا ثناء اللہ اسلام آباد کو جتنے مرضی کنٹینرلگا کربند کر دو،  پی ٹی آئی کے کارکنان لانگ مارچ کیلئے پرجوش ہیں۔

صوبائی وزیر صحت وصدر پی ٹی آئی سنٹرل پنجاب ڈاکٹر یاسمین راشد نے مزید کہا کہ نام نہادوفاقی حکومت کو ہوش کے ناخن لینے چاہئیں، وفاقی حکومت چوں چوں کا مربہ ہے جبکہ امپورٹڈ حکومت نے پاکستانی قوم کو مہنگائی کے علاوہ کچھ نہیں دیا ہے۔

اس موقع پر کرنل(ر)اعجاز منہاس، طارق ثناء باجوہ، عندلیب عباس، شنیلہ علی، زبیرخان نیازی، ڈاکٹرعظیم الدین زاہد، رخسانہ، میاں زاہدالرحمن، طارق حمید، نوشین حامد، سعدیہ سہیل و دیگررہنما بھی موجود تھے۔