بیرسٹر سیفنے کہا ہے کہ پشاور سمیت تمام ائیرپورٹس وفاق کے زیر انتظام ہیں۔

تفصیلات کے مطابق بیرسٹر سیف نے اپنے ایک بیان میں کہا کہ تھریٹ الرٹ کاؤنٹر ٹیررازم ڈیپارٹمنٹ نے جاری کیا ہے جبکہ وزیراعلیٰ خیبرپختونخوا کا تھریٹ الرٹس جاری کرانے میں کوئی کردار نہیں ہوتا ہے۔

انہوں نے کہا کہ تھریٹ الرٹ جاری کرنے سمیت دہشت گردی سے متعلق دیگر معاملات نمٹانا بھی محکمہ انسداد دہشت گردی کی ذمہ داری ہے۔

ان کا کہنا تھا کہ ارشد شریف کے بیانات کے مطابق انہیں اور ان کے  خاندان کو دھمکیاں مل رہی تھیں جبکہ سی ٹی ڈی کے تھریٹ الرٹ میں بھی یہی بات تھی۔

بیرسٹر سیف نے کہا کہ تھریٹ الرٹ غلط ہوتا تو ارشد شریف کینیا میں قتل نہ ہوتے۔

انہوں نے کہا کہ پشاور سمیت تمام ائیرپورٹس وفاق کے زیر انتظام ہیں جبکہ ائیرپورٹس پر موجود ایف آئی اے، اے این ایف اور اے ایس ایف بھی وفاقی ادارے ہیں۔

ان کا کہنا تھا کہ اہم سیاسی و سماجی شخصیات اور سینیئر صحافیوں کو رابطہ کرنے پر پروٹوکول دیا جاتا ہے، اسی طرح ارشد شریف کو بھی پروٹوکول دیا گیا۔

ان کا یہ بھی کہنا تھا کہ رانا بدمعاش اور خواجہ کرپشن دونوں ارشد شریف قتل کے سرغنہ ہیں۔

 بیرسٹر سیف نے مزید کہا کہ پی ڈی ایم کی جانب سے ارشد شریف کی عین تدفین کے وقت پریس کانفرنسز کی گئیں جبکہ پے در پے پریس کانفرنسسز اپنا یہ کالا کرتوت چھپانے کے لئے کی گئیں تھیں۔