اپوزیشن لیڈر ڈاکٹر شہزاد وسیم نے کہا ہے کہ یہ حکومت قانون پاس نہیں بلڈوز کرنے آئی ہے۔

تفصیلات کے مطابق قائد حزب اختلاف شہزاد وسیم نے سینیٹ اجلاس میں اظہار خیال کرتے ہوئے کہا کہ گزشتہ 24 گھنٹوں کے دوران ان وزرا نے سائفر پر درجنوں پریس کانفرنسز کیں، پہلے یہ سائفر کو مانتے نہیں تھے اب یہ اسے حقیقت بتا رہے ہیں۔

ان کا کہنا تھا کہ عمران خان واحد لیڈر ہے جو کمرے میں بات کرتا ہے وہی باہر ہوتی ہے، آڈیو لیکس میں دیکھ لیں کس طرح ان کی اپنے کاروبار کیلئے کالیں سنی گئیں۔

انہوں نے کہا کہ قانون اور انصاف کی باتیں کرنے والے ججوں کے بارے میں آڈیو لیکس پر کس طرح باتیں کر رہے ہیں، یہ وہی جماعت ہے جنہوں نے پہلے بھی ججوں کے خلاف ایسے ہی طریقے اپنائے۔

شہزاد وسیم نے کہا کہ جس طرح سے یہ کابینہ کام کر رہی ہے وہ صرف بھرتیوں کا ہے، 73 رکنی بھاری بھرکم کابینہ سوائے بھرتیوں کے کچھ نہ کر سکی۔