امیر جماعت اسلامی سراج الحق نے کہا ہے کہ اسلامی نظام کے قیام کے لیے جدوجہد میں مزید تیزی لائیں گے۔

تفصیلات کے مطابق امیر جماعت اسلامی سراج الحق نے اپنے بیان میں کہا کہ پی ڈی ایم اور پی ٹی آئی کی حکومتیں این آر او کے ذریعے قائم ہوئیں، حکمران معاشرے کو مغرب زدہ بنانے کی سازشوں میں آلہ کار بنے ہوئے ہیں۔

ان کا کہنا تھا کہ تینوں جماعتوں کی ناکام پالیسیوں سے ملک کی نسلیں قرضوں کی دلدل میں پھنس گئیں ہیں، مہنگائی نے عوام کا جینا دوبھر کر دیا ہے، بے روزگاری سے نوجوان مایوس اور ڈپریشن کا شکار ہیں، طاقتور کے احتساب اور آئین و قانون کی بالادستی سے ملک آگے بڑھے گا۔

انہوں نے مزید کہا کہ سات دہائیوں سے ملک کے وسائل کو بے دردی سے لوٹا جا رہا ہے، باربار اقتدار میں آنے والی جماعتوں نے عوام کو مایوسیوں کے سوا کچھ نہیں دیا۔