پاکستان تحریک انصاف (پی ٹی آئی) کے رہنما عمران اسماعیل نے کہا ہے کہ تمام چور بری ہو کر وزیر بنائے جارہے ہیں۔

سماجی رابطے کی ویب سائٹ ٹوئٹر پر اپنے جاری کردہ بیان میں عمران اسماعیل نے کہا کہ نیب سے اب آصف زرداری کو رلیف ملنے جارہا ہے، تمام چور بری ہوکر یا امپورٹ ہو کر وزیر بنائے جارہے ہیں۔

نیب سے اب آصف زرداری کورلیف ملنے جارہا ہے تمام چور بری ہوکریا امپورٹ ہوکر وزیربنائے جارہے ہیں اس سارے معاملے میں زیادتی MQM کیساتھ ہورہی ہے نہ من پسند وزارتیں ملی،نہ کیسز ختم ہوسکےاورگورنر بھی امپورٹ کرکے لگادیا گیا MQM اب جماعت نہیں صرف آپشن کے طور ہی سیاست میں کردار ادا کرے گی.

— Imran Ismail (@ImranIsmailPTI) October 20, 2022

انہوں نے کہا کہ اس سارے معاملے میں زیادتی ایم کیو ایم کیساتھ ہورہی ہے، نہ من پسند وزارتیں ملی، نہ کیسز ختم ہوسکے اور گورنر بھی امپورٹ کر کے لگادیا گیا۔

سابق گورنر سندھ کا کہنا ہے کہ ایم کیو ایم اب جماعت نہیں صرف آپشن کے طور ہی سیاست میں کردار ادا کرے گی۔

پی ٹی آئی رہنما نے کہا کہ پاکستانی نیرو یہ نہ سمجھے کہ وہ بانسری بجاکر چین سے سوجائے گا، معیشت اور سیاست کو نقصان پہنچانے والے عوام سے ڈر رہے ہیں۔

عمران اسماعیل نے مزید کہا کہ پی ڈی ایم کی ضمنی انتخابات میں بدترین شکست پر بلاول خوشیاں منارہے ہیں جبکہ ایون فیلڈ میں صف ماتم بچھا ہوا ہے۔ عوام نے نوسربازوں تاحیات سبق سکھانے کی ٹھان لی ہے۔

آصف زرداری کیخلاف 25 سال پرانے کیسز میں بڑی پیشرفت

گزشتہ روز سابق صدر  مملکت اور پیپلزپارٹی کے شریک چیئرمین آصف زرداری کے خلاف 25 سال پرانے کیسز میں بڑی پیشرفت سامنے آئی تھی۔

 نیب نے آصف زرداری کی بریت  کے خلاف اپیلیں واپس لینےکا فیصلہ کیا تھا۔

نیب نے 25 سال پرانے کیسز میں سابق صدر کی بریت کے خلاف چار اپیلیں واپس لینے کی اسلام آباد ہائیکورٹ میں درخواست دائر کردی۔

نیب نے اپنی درخواست میں کہا ہے کہ اپیلوں کی مزید پروسیکیوشن ایک لاحاصل مشق ہو گی، آصف زرداری کے خلاف دستاویزات کی فوٹو کاپیاں بھی مشکل سے ریکارڈ پر ہیں۔

نیب نے اپنی درخواست میں مؤقف پیش کیا ہے کہ دستیاب دستاویزی شواہد قانون شہادت کےمطابق نہیں۔

واضح رہے کہ نیب نے آصف زرداری کی بریت کو 2015 سے چیلنج کر رکھا تھا۔