پاکستان تحریک انصاف نے ضمنی انتخابات میں میدان مارلیا جہاں اسے قومی اسمبلی کی 8 میں سے 6 اور صوبائی اسمبلی کی 3 میں سے 2 نشستوں پر کامیابی حاصل ہوئی۔ 

تفصیلات کے مطابق سابق وزیر اعظم اور چیئرمین پی ٹی آئی عمران خان قومی اسمبلی کے 7 حلقوں پر پاکستان ڈیموکریٹک موومنٹ (پی ڈی ایم) کے مشترکہ امیدوار کے خلاف الیکشن لڑرہے تھے جس میں انہیں 6 نشستوں (پشاور، مردان، چارسدہ، فیصل آباد، ننکانہ صاحب اور کورنگی) کی نشست پر کامیابی حاصل ہوئی۔

عمران خان کو صرف ایک ہی نشست پر ناکامی کا سامنا کرنا پڑا۔ وہ کراچی کے حلقے این اے 237 ملیر میں پیپلزپارٹی کے امیدوار عبدالحکیم بلوچ سے ہارگئے۔

اس کے علاوہ پی ٹی آئی کو ملتان میں بھی اپ سیٹ شکست کا سامنا کرنا پڑا جہاں پی ٹی آئی کے وائس چیئرمین شاہ محمود قریشی کی صاحبزادی مہربانو قریشی کو سابق وزیراعظم یوسف رضا گیلانی کے صاحبزادے علی موسیٰ گیلانی کے ہاتھوں شکست ہوئی۔

پاکستان تحریک انصاف کو صوبائی حلقے پی پی 139 شیخوپورہ میں بھی شکست کا سامنا کرنا پڑا جہاں مسلم لیگ ن کے چوہدری افتخار 40 ہزار 829 ووٹ لے کر کامیاب ہوئے۔

پشاور

پشاور کے حلقہ این اے 31 کے تمام پولنگ اسٹیشنز کے غیر حتمی غیر سرکاری نتائج کے مطابق پاکستان تحریک انصاف کے امیدوار عمران خان 57 ہزار 824 ووٹ لے کر کامیاب ہوگئے ہیں۔ اے این پے کے غلام احمد  بلور نے 32 ہزار 253 ووٹ حاصل کیے۔

مردان

مرادن کے حلقہ این اے 22 کے تمام پولنگ اسٹیشن کے غیر رسمی اور غیر سرکاری نتائج کے مطابق چیئرمین پی ٹی آئی عمران خان 76 ہزار 681 ووٹ لے کر کامیاب ہوگئے ہیں  اور جے یو آئی ف کے امیدوار مولانا محمد قاسم 68 ہزار 181 ووٹ لے کر دوسرے نمبر پر رہے۔

چارسدہ

چارسدہ کے حلقہ این اے 24 کے تمام پولنگ اسٹیشن کے غیر رسمی اور غیر سرکاری نتائج کے مطابق پی ٹی آئی کے امیدوار عمران خان 78 ہزار 589 ووٹ لے کر پہلے جب کہ اے این پی کے امیدوار ایمل ولی 68 ہزار 353 ووٹ لے کر دوسرے نمبر پر رہے۔

فیصل آباد

فیصل آباد کے حلقہ این اے 108 میں عمران خان نے عابد شیر علی کو 24 ہزار سے زائد مارجن سے بدترین شکست سے دوچار کیا۔ تمام پولنگ اسٹیشنز کے غیر حتمی غیر سرکاری نتائج کے مطابق پاکستان تحریک انصاف کے چیئرمین عمران خان 99 ہزار 602 ووٹ لے کر کامیاب ہوئے جب کہ مسلم لیگ ن کے امیدوار عابد شیر علی 75 ہزار 131 ووٹ لے کر دوسرے نمبر رہے۔

ننکانہ صاحب

ننکانہ صاحب  کے حلقہ این اے 118 کے تمام پولنگ اسٹیشن کے غیر حتمی اور غیر سرکاری نتائج کے مطابق  پی ٹی آئی کے امیدوار عمران خان  90 ہزار 180 ووٹ لے کر کامیاب قرار پائے اور مسلم لیگ ن کی امیدوار ڈاکٹر شذرہ منصب 78  ہزار ووٹ حاصل کیے۔

ملتان

ملتان کے حلقہ این اے 157 میں پی ٹی آئی کو اپ سیٹ شکست کا سامنا کرنا پڑا۔ تمام  پولنگ اسٹیشن  کے غیر سرکاری اور غیر حتمی نتائج کے مطابق پاکستان پیپلزپارٹی کے امیدوار علی موسیٰ گیلانی 79 ہزار 713 ووٹ لے کر کامیاب ہوگئے ہیں جب کہ پی ٹی آئی امیدوارمہر بانو 59 ہزار 993 ووٹ حاصل کرنے میں کامیاب رہیں۔

کراچی

کراچی کے حلقہ این اے 237 ملیر میں بھی پی ٹی آئی کو اپ سیٹ شکست ہوئی اور یہ واحد حلقہ تھا جہاں عمران خان کو شکست کا سامنا کرنا پڑا۔ تمام پولنگ اسٹیشن کے غیر سرکاری اور غیر حتمی نتائج کے مطابق پیپلز پارٹی کے امیدوار حکیم بلوچ 32 ہزار 567 ووٹ لیکر  کامیاب ہوئے جب کہ پاکستان تحریک انصاف کے چیئرمین عمران خان 22  ہزار 493 ووٹ لیکر دوسرے نمبر پر رہے۔

کراچی کے ایک اور حلقہ این اے 239 کے تمام پولنگ اسٹیشنز کے غیر حتمی  اور غیر سرکاری نتائج کے مطابق پی ٹی آئی کے امیدوار عمران خان 5 ہزار 805 ووٹ لے کر کامیاب ہوگئے ہیں اور ایم کیو ایم کے نئیر رضا 1103 ووٹ لیکر دوسرے نمبر رہے۔

صوبائی حلقوں میں 3 پر پی ٹی آئی اور ایک پر مسلم لیگ (ن) کامیاب 

قومی اسمبلی کے 8 حلقوں کے علاوہ پنجاب اسمبلی کے تین حلقوں پی پی 139 شیخوپورہ، پی پی 209 خانیوال اور پی پی 241 بہاولنگر کے ضمنی انتخابات میں صرف شیخوپورہ میں مسلم لیگ (ن) کو کامیابی حاصل ہوئی۔

خانیوال

پی پی 209 خانیوال کے پولنگ اسٹیشنز کے غیر سرکاری اور غیر حتمی نتائج کے مطابق تحریک انصاف کے فیصل نیازی 71 ہزار 586  ووٹ کر کر کامیاب ہوئے ہیں جب کہ ن لیگ کے چوہدری ضیاء الرحمان 57 ہزار 864 ووٹ کر کر دوسرے نمبر پر رہے۔

بہاولنگر

پی پی 241 بہاولنگر کے تمام پولنگ اسٹیشن کے غیر حتمی غیر سرکاری نتائج کے مطابق پی ٹی آئی کے امیدوار ملک محمد مظفر خان  59 ہزار 956 ووٹ لے کر کامیاب ہوگئے ہیں  اور مسلم لیگ ن کے امیدوار امان اللہ ستار  48 ہزار 47 ووٹ لے کر دوسرے نمبر رہے۔

شیخوپورہ

پی پی 139 شیخوپورہ کے  پولنگ اسٹیشنز کے غیر سرکاری اور غیر حتمی نتائج کے مطابق مسلم لیگ ن کے چوہدری افتخار 40 ہزار 829 ووٹ لے کر کامیاب قرار پائے ہیں اور پی ٹی آئی کے محمد ابو بکر 37 ہزار 712 ووٹ حاصل کرنے میں کامیاب رہے۔

قومی اسمبلی کے 8 حلقوں میں ضمنی انتخاب

خیال رہے کہ پاکستان تحریک انصاف (پی ٹی آئی) کے اراکین قومی اسمبلی کے استعفے منظور ہونے کے بعد خالی ہونے والی پنجاب کی 4، خیبرپختونخوا اور سندھ کی 2 نشتوں پر آج ضمنی انتخابات ہورہے ہیں۔

پنجاب میں ایک ہزار 434، خیبرپختونخوا میں 979 اور کراچی میں 340 پولنگ اسٹیشنز قائم کیے گئے ہیں، پولنگ کا عمل آج صبح 8 بجے شروع ہوا جو شام 5 بجے تک جاری رہے گا۔

ملک کی سیاسی تاریخ میں یہ منفرد مثال ہوگی کہ ایک امیدوار (چیئرمین پی ٹی آئی عمران خان) 8 میں سے 7 نشستوں پر انتخاب لڑ رہے ہیں جب کہ ایک نشست پر شاہ محمود قریشی کی صاحبزادی مہر بانو پی ٹی آئی کے ٹکٹ سے بلے کے نشان پر الیکشن لڑ رہی ہیں، تینوں صوبوں میں پی ڈی ایم اور حکومت کی اتحادی جماعتوں کا پی ٹی آئی سے سخت مقابلہ ہے۔

آزاد امیدواروں سمیت مختلف سیاسی جماعتوں کے کُل 101 امیدوار انتخابات میں حصہ لے رہے ہیں، پنجاب میں 52، سندھ میں 33 اور خیبرپختونخوا میں 16 امیدوار ہیں، ان حلقوں میں تقریباً 44 لاکھ 72 ہزار ووٹرز رجسٹرڈ ہیں۔

خیبرپختونخوا

خیبرپختونخوا کے حلقے این اے 22 مردان میں جمیعت علما اسلام کی جانب سے مولانا قاسم جبکہ چارسدہ حلقہ این اے 24 سے عوامی نیشنل پارٹی کے صوبائی صدر ایمل خان ولی کو ٹکٹ دیا گیا ہے، ان دونوں امیدواروں کی حکومت میں شامل تمام اتحادی جماعتوں نے حمایت کا اعلان کردیا ہے۔

پنجاب 

پنجاب کی تین نشستوں حلقہ این اے 108 فیصل آباد، ننکانہ صاحب این اے 118 سے مسلم لیگ ن نے بالترتیب عابد شیر علی اور ڈاکٹر شذرہ منصب علی کو ٹکٹ دیا گیا، جن کو پی ڈی ایم کی حمایت بھی حاصل ہے۔ ان دونوں حلقوں پر بھی لیگی امیدواروں کے مدمقابل عمران خان ہیں۔

کراچی 

کراچی کے حلقہ این اے 237 اور 239 میں عمران خان کے مدمقابل پی ڈی ایم نے بالترتیب عبدالحکیم بلوچ اور ایم کیو ایم کے نیئر رضا کو مشترکہ امیدوار نامزد کیا ہے۔ حلقہ این سے 237 میں مجموعی طور پر گیارہ جب کہ حلقہ این اے 239 میں مجموعی طور پر 22 امیدوار مد مقابل ہیں۔

سیکیورٹی انتظامات

تمام حلقوں کی سکیورٹی کے لیے پولیس، رینجرز اور پاک فوج کی خدمات حاصل کی گئی ہیں اور پولنگ والے حلقوں میں دفعہ 144 نافذ کی گئی ہے۔

کراچی میں جعلی ووٹ ڈالے جانے کا انکشاف

این اے 237 کراچی میں ضمنی انتخاب کے دوران ملیر آسو گوٹھ کے علاقے میں جعلی ووٹ ڈالے جانے کا انکشاف ہوا ہے۔

پریزائیڈنگ افسر مظہربھٹی کا کہنا ہےکہ لنچ ٹائم کے دوران چند افراد کمرے میں آئے، ان افراد نے بیلٹ پیپرز پر ٹھپے لگائے، جب شور کی آواز آئی تو کمرے میں پولیس کو بلایا، تمام افراد فرار ہونے میں کامیاب ہوگئے۔

پریزائیڈنگ افسر کے مطابق بلٹ پیپرز کو دیکھ کر پتا چلا کہ 12 سے 15 جعلی ووٹ ڈالےگئے، ملزمان نے تیر پر ٹھپہ لگایا تھا۔

صوبائی الیکشن کمشنر سندھ نے ڈسٹرکٹ ریٹرننگ آفیسر اور ریٹرننگ آفیسر کو ہدایات دی ہیں کہ واقعےکی تفصیل دی جائے، جعلی ووٹوں کو گنتی سے خارج کیا جائے، بیلٹ پیپرکی پشت پر اسسٹنٹ پریذائیڈنگ افسرکا دستخط یا اسٹیمپ نہ ہو وہ نہ گنا جائے۔