پاک فضائیہ کی جانب سے سیلاب متاثرین کو سہولیات کی فراہمی کیلئے ہر ممکن کوششیں جاری ہیں۔

اس حوالے سے ترجمان پاک فضائیہ کا کہنا ہے کہ جیکب آباد اور بھولاری میں قائم شدہ، پاک فضائیہ کے فلڈ ریلیف کیمپوں میں موجود سیلاب سے متاثرہ بچوں میں گڈی بیگز تقسیم کئے گئے ہیں۔

ترجمان نے بتایا کہ پاک فضائیہ کی سول انتظامیہ کے شانہ بشانہ، سیلاب زدہ علاقوں میں متاثرینِ سیلاب کو سہولیات کی فراہمی کے لیے ہر ممکن کوششیں جاری ہیں۔

ترجمان نے بتایا کہ پاک فضائیہ کی جانب سے پی اے ایف فلڈ ریلیف کیمپوں میں موجود مصیبت زدہ بچوں میں چاکلیٹ، مٹھائیاں اور اسٹیشنری کے سامان پر مشتمل 8000 سے زائد پیکٹ تقسیم کئے گئے ہیں جبکہ سیلاب زدگان کی امداد اور بحالی کے لیے پاک فضائیہ کی ہنگامی رسپانس ٹیموں کی کاوشیں جاری ہیں۔

ترجمان کا کہنا تھا کہ پاک فضائیہ کی جانب سے یہ کوششیں قدرتی آفات اور حادثات کے دوران پاک فضائیہ کےہمیشہ ہراول دستے کے طور پر پیش پیش رہنے کے عزم کا منہ بولتا ثبوت ہیں-۔

ترجمان کے مطابق پاک فضائیہ کے اہلکاروں نے امدادی سرگرمیوں میں ہمیشہ بڑھ چڑھ کے حصہ لیا تاکہ عزیز ہم وطنوں کے دکھوں کا مداوا ہو سکے۔