ترجمان وزیر اعلیٰ پنجاب فیاض الحسن چوہان کا نے کہا ہے کہ امپورٹڈ حکومت کے خلاف جو کچھ ہونے جا رہا ہے وہ اس کے وہم وگمان میں بھی نہیں ہے۔

ترجمان پنجاب حکومت فیاض الحسن چوہان نے پی ٹی آئی کے لانگ مارچ کے حوالے سے اپنے جاری کردہ بیان میں کہا کہ پی ٹی آئی کا تاریخی لانگ مارچ امپورٹڈ حکومت کے تابوت میں آخری کیل ثابت ہو گا۔

انہوں نے کہا کہ لانگ مارچ رانا ثناء اللہ کی کھوکھلی بڑھکیں بند کروا دیگا، رانا ثناء اللہ جو صرف چھوٹی بڑھکیں مارتا اور دھمکیاں دیتا ہے اس کو چھپنے کی جگہ نہیں ملے گی۔

‘پی ٹی آئی کا پرامن احتجاج امپورٹڈ حکومت کو بہا لے جائے گا’

ترجمان وزیر اعلیٰ کا کہنا ہے کہ لانگ مارچ کے اعلان کے بعد پی ڈی ایم بوکھلاہٹ کا شکار ہوچکی ہے، امپورٹڈ حکومت کے خلاف جو کچھ ہونے جا رہا ہے وہ اس کے وہم وگمان میں بھی نہیں ہے۔

فیاض الحسن چوہان نے مزید کہا کہ پی ٹی آئی کا پر امن احتجاج امپورٹڈ حکومت کو ساتھ بہا لے جائے گا، عوام اسلام آباد پہنچ کر رانا ثناء اللہ کو پکارے گی،”آجا مورے بالما تیرا انتظار ہے”، جو اب بڑھکیں مار رہا وہ اس دن ڈھونڈنے سے بھی نہیں ملے گا۔

عمران خان کا ممکنہ دھرنا، اسلام آباد انتظامیہ نے تیاریاں مکمل کرلیں

سابق وزیراعظم اور چیئرمین پی ٹی آئی عمران خان کے ممکنہ دھرنے کی کال سے نمٹنے کے لئے اسلام آباد انتظامیہ نے تیاریاں مکمل کرلیں ہیں۔

اس حوالے سے ذرائع کا کہنا ہے کہ اسلام آباد پولیس نے 1100 سے زائد کنٹینر اکٹھے کر لیے ہیں جو کہ فیض آباد پہنچا دیئے گئے۔

ذرائع نے بتایا ہے کہ دھرنے کے اعلان کے بعد اسلام آباد کو ایک ہفتے کے لیے مکمل سیل کر دیا جائے گا جبکہ اسکول و کالجوں میں چھٹیاں اور امتحانات ملتوی کیے جائیں گے ۔

ذرائع نے بتایا ہے کہ اسلام آباد کو پولیس سمیت پچیس ہزار کی نفری فراہم کی جائے گی جبکہ ان کے پاس پچاس ہزار ربڑ گولیاں ہونگی جبکہ سیکورٹی ادروں کو ساٹھ ہزار سے زائد آنسو گیس کے شیل فراہم کر دیے گئے ۔

ذرائع کا کہنا ہے کہ اسلام آباد کو دس ڈرون فراہم کیے جائیں گے جن کے ذریعے شیل مظاہرین پر پھینکیں جائیں گے جبکہ اینٹی رائیٹ کے لئے پہلی مرتبہ ہیلی کاپٹر بھی استعمال کیا جائے گا۔

ذرائع کے مطابق سیکورٹی اداروں نے پی ٹی آئی کے فنانسرز کے گرفتاریوں کے لیے لسٹیں تیار کر لی ہیں تاہم عمران خان نے اگر بنی گالہ سے دھرنے کا اعلان کیا تو بنی گالہ کو سب جیل قرار دے کر انہیں وہیں ہاؤس اریسٹ کر کیا جائے گا ۔