خرم دستگیر نے کہا ہے کہ ہمارے سامنے ایک فسادی ٹولا آ کر کھڑا ہوگیا ہے۔

تفصیلات کے مطابق وفاقی وزیر توانائی خرم دستگیر خان نے ورکرز کنونشن سے خطاب کرتے ہوئے کہا کہ گھڑی چور فتنہ اور فساد بہت تباہی کر چکا ہے، آج ہم اپنے لیڈر کو واپس بلانے کے لیے اکٹھے ہوئے ہیں۔

  انہوں نے کہا کہ دنیا میں اگر کسی پاکستانی لیڈر کی عزت ہے وہ میاں نواز شریف کی ہے، میاں صاحب اب ملک کو ترقی چاہیے آپ واپس آجائیں۔

خرم دستگیر خان نے یہ بھی کہا کہ پاکستان میں کوئی سیلاب زدگان کا حال پوچھتا ہے اور سر پر ہاتھ رکھتا ہے تو وہ صرف نواز شریف ہے، ترقی بھی نواز شریف دیتا ہے اور امن بھی نواز شریف دیتا ہے۔

وفاقی وزیر توانائی کا کہنا تھا کہ 1998 میں جب ہندوستان نے دھماکہ کیا تو نواز شریف نے فتنہ کی طرح یہ نہیں کہا کہ 2 منٹ کی خاموشی کریں، میں پورے ملک میں گیا ہو اگر ترقی پر کسی کی مہر ہے تو وہ نواز شریف کی ہے۔

خرم دستگیر خان کا یہ بھی کہنا تھا کہ یہ بہادری نعروں سے نہیں ہوتی جان ہونی چاہیے،28 مئی کو نواز شریف نے ملک کو ایٹمی طاقت بنا دیا۔

انہوں نے کہا کہ یہ بزدل انسان عمران جو آج بھڑکیں لگا رہا ہے، جب عمران خان کا امتحان ہوا 2019 میں تو اس نے کشمیر بھیج دیا۔

خرم دستگیر نے یہ بھی کہا کہ ہمارے سامنے ایک فسادی ٹولا آ کر کھڑا ہوگیا ہے، ہم سڑکیں بنانے والے ہیں یہ سڑکیں کھودنے والے ہیں جبکہ ہم امن دینے والے ہیں یہ بد امنی پھیلانے والے ہیں۔

ان کا کہنا تھا کہ گوجرانوالہ کل بھی نواز شریف کا تھا اب بھی نواز شریف کا ہے ، ہم اس فسادی کی آنکھوں میں آنکھیں ڈال کر اس کا مقابلہ کریں گیے، ہم اس کو ووٹ کی طاقت سے چاروں صوبوں میں گرائیں گئے۔

وزیر توانائی خرم دستگیر خان کا مزید کہنا تھا کہ ہم سی پیک بنانے والے ہیں اور یہ اس کو برباد کرنے والے ہیں، انشاءاللہ پورے ملک میں بجلی ،کھاد اور گندم سستی کریں گے۔