آئی جی سندھ غلام نبی میمن نے او آئی سی سی آئی کا خصوصی دورہ کیا۔

تفصیلات کے مطابق آئی جی سندھ غلام نبی میمن نے اوورسیز انویسٹرز چیمبر آف کامرس اینڈ اندسٹریز (OICCI) کے دفتر شیل ہاؤس کلفٹن کا دورہ کیا۔

سی ای/ سیکریٹری جنرل عبدالعلیم اور ممبر کمیٹی او آئی سی سی آئی و دیگر شرکاء نے آئی جی سندھ کو خوش آمدید کہا اور دوران ملاقات تاجر برادری اور باالخصوص بیرونی ممالک کے سرمایہ کاروں کو درپیش مسائل و مشکلات سمیت امن و امان کی موجودہ صورتحال، ٹریفک جام جیسے ایشوز پر تفصیلی تبادلہ خیال کیا اور پولیس سے مربوط و مستحکم روابط کے لیے فوکل پرسن نامزد کرنے کی سفارش کی۔

اس موقع پر سیکریٹری جنرل عبدالعلیم نے کہا کہ اس تنظیم کا قیام 150 سال قبل عمل میں لایا گیا جسکا مقصد بیرون ممالک سے پاکستان میں سرمایہ کرنیوالوں کو پروٹیکٹ کرنا اور ملکی معیشت کی ترقی میں انکے کردار کو مذید تقویت دینا ہے، موجودہ اور نئے سرمایہ کاروں کو پروموٹ کرنا اور اس حوالے سے انکی بھرپور معاونت و رہنمائی کرنا OICCI کا وژن ہے۔

آئی جی سندھ نے اپنے خطاب میں کہا کہ اسٹریٹ کرائمز، دوران ڈکیتی قتل اور منشیات جیسے جرائم انتہائی اہم اور حساس ایشوز ہیں جنہیں سندھ پولیس سنجیدگی سے لے رہی ہے۔

ان کا کہنا تھا کہ ملزمان کی اکثریت منشیات و دیگر نشہ آور اشیاء کے استعمال کرنیوالوں کی ہیں۔

انہوں نے کہا کہ اسٹریٹ کرائمز، قتل، دوران ڈکیتی قتل، منشیات کی خرید وفروخت کے خلاف سندھ پولیس جدید تیکنیکس پر مشتمل حکمت عملی اور لائحہ عمل کے تحت آگے بڑھ رہی ہے، معصوم شہریوں کو جانی و مالی نقصان پہنچانے والوں سے پولیس ہرگز رعایت نہیں کرے گی اور بلا امتیاز پولیس ایکشن سے معاشرے کے ان ناسوروں کے خاتمے کو یقینی بنائے گی۔

ان کا کہنا تھا کہ جرائم سے صوبہ سندھ ہی نہیں بلکہ ملک کے دیگر صوبے بھی متاثر ہیں تاہم سندھ پولیس دستیاب وسائل میں رہتے ہوئے جرائم پیشہ عناصر،انکے گروہوں اور سرپرستوں کی بیخ کنی میں شب و روز سرگرم اور مصروف عمل ہے۔

آئی جی سندھ نے کہا کہ انسداد منشیات کے خلاف تمام ایس ایس پیز تفویض کردہ ٹاسک پر عمل درآمد کو یقینی بنارہے ہیں جسکے تحت منشیات، گٹکا ماوا کی خرید و فروخت کے خلاف صوبائی سطح پر بلا تفریق ایکشن کو یقینی بنایا جارہا ہے۔

غلام نبی میمن نے کہا کہ امتناع منشیات ایکٹ میں ترامیم پر مشتمل جامع سفارشات بھی حکومت سندھ کو ارسال کی جارہی ہیں جسکا مقصد موجودہ قانون کو مذید سخت اور امتناع منشیات اقدامات کے تحت اسے مؤثر بھی بنانا ہے۔

آئی جی سندھ کا کہنا تھا کہ حکومت سندھ سی ٹی ڈی، آر آر ایف اور انویسٹی گیشن کی اپ گریڈیشن اور استعدادی صلاحیتوں میں اضافے کے لیے مکمل سپورٹ فراہم کر رہی ہے جس کے لیے میں حکومت سندھ کا مشکور و ممنون ہے۔

انہوں نے کہا کہ پولیسنگ کے ہر عمل میں جدید ٹیکنالوجی کا استعمال ایک ضرورت بن چکا ہے۔پولیس تمام تر دستیاب وسائل کو بروئے کار لاتے ہوئے ماڈرن تیکنیکس، اسکی اہمیت اور افادیت کو پیش نظر رکھ کر آگے بڑھ رہی ہے۔

آئی جی سندھ نے او آئی سی سی آئی سے روابط اور ان کے مسائل و مشکلات کے حل کے لیے اے آئی جی آپریشنز سندھ کو فوکل پرسن نامزد کرتے ہوئے خصوصی ہدایات بھی دیں۔