وزیر پارلیمانی امور راجہ بشارت نے کہا ہے کہ لانگ مارچ کے عقب سے بغیر چیکنگ کسی کی شمولیت نہیں ہونی چاہیے۔

تفصیلات کے مطابق وزیر پارلیمانی امور راجہ بشارت کی زیر صدارت کابینہ کمیٹی لا اینڈ آرڈر کا اجلاس ہوا جس میں لانگ مارچ کی سیکیورٹی کا جائزہ لیا گیا۔

راجہ بشارت کا اس موقعے پر کہنا تھا کہ بڑے شہروں میں مارچ کی آمد پر ٹریفک انتظامات کا خاص خیال رکھیں، شہریوں کو ٹریفک کی روانی میں کم سے کم پریشانی ہونی چاہیے۔

انہوں نے پولیس اور انتظامیہ کو لانگ مارچ یا جلسے کے قریب پیٹرول پمپ بند رکھنے کی ہدایت کر دی۔

چیف سیکرٹری عبداللہ سنبل نے کہا کہ طے شدہ سیکیورٹی ایس او پیز پر من و عن عملدرآمد یقینی بنایا جائے، پولیس نفری کی تعیناتی متوازن ہونی چاہیے، سستی کی گنجائش نہیں۔