ڈاکٹر یاسمین راشد نے کہا ہے کہ ملک میں حقیقی آزادی کیلئے نوجوانوں کو نکلنا ہوگا۔

تفصیلات کے مطابق صوبائی وزیرصحت و صدر پی ٹی آئی سنٹرل پنجاب ڈاکٹر یاسمین راشد نے گورننگ باڈی کا ہنگامی اجلاس طلب کیا جس عندلیب عباس، زبیرخان نیازی، ڈاکٹرعظیم الدین، شنیلہ علی، شیخ امتیاز، سعدیہ سہیل، احمد طحہٰ، راجہ شکیل زمان، رانا سمیع، کریم، منیب،عبداللہ بٹ، ایڈووکیٹ مدثر ودیگر ممبران نے شرکت کی۔

صوبائی وزیر صحت وصدر پی ٹی آئی سنٹرل پنجاب ڈاکٹر یاسمین راشد نے ہنگامی اجلاس کے دوران حقیقی آزادی مارچ کے انتظامات کا تفصیلی جائزہ بھی لیا۔

اجلاس کے دوران عندلیب عباس اور زبیر خان نیازی نے صوبائی وزیر صحت و صدرپی ٹی آئی سنٹرل پنجاب ڈاکٹر یاسمین راشد کو حقیقی آزادی مارچ کی حکمت عملی کی تفصیلات سے بھی آگاہ کیا۔

اس موقع پر ڈاکٹر یاسمین راشد نے کہا کہ چیئرمین پاکستان تحریک انصاف عمران خان نے 8 نومبر کو وزیرآباد سے 2دوپہر بجے سے دوبارہ حقیقی آزادی مارچ شروع کرنے کا اعلان کر دیا ہے۔

انہوں نے کہا کہ عمران خان حقیقی آزادی مارچ سے روزانہ آن لائن خطاب کریں گے جبکہ حقیقی آزادی مارچ کے راولپنڈی پہنچنے پر چیئرمین پی ٹی آئی عمران خان خود قیادت کریں گے۔

ان کا کہنا تھا کہ پاکستان تحریک انصاف ملک میں تاریخ رقم کر رہی ہے، ملک میں حقیقی آزادی مارچ کے لیے نوجوانوں کو نکلنا ہوگا۔

ڈاکٹر یاسمین راشد نے کہا کہ پاکستان کی قسمت کا فیصلہ اب ہمیں کرنا ہوگا، ہمیں پاکستان میں غلام نہیں بلکہ خوددار بن کر زندگی گزارنی ہے جبکہ غلامی کی زندگی سے عزت کی موت بہتر ہے۔

انہوں نے کہا کہ پوری پاکستان قوم عمران خان کے ساتھ کھڑی ہے جبکہ عمران خان نے ملک کے خلاف سازش کرنے والے تمام عناصرکو بے نقاب کر دیا ہے۔

 ان کا کہنا تھا کہ حقیقی آزادی مارچ کے ذریعے پاکستان کو غلاموں سے آزاد کروا کر رہیں گے جبکہ وفاقی حکومت حقیقی آزادی مارچ میں عوامی سمندرکو نہیں روک پائے گی۔

ڈاکٹر یاسمین راشد نے کہا کہ پاکستان سیاسی انتشار کا کبھی بھی متحمل نہیں ہو سکتا ہے۔

انہوں نے کہا کہ عمران خان نے صرف صاف اور شفاف انتخابات کے علاوہ حکومت وقت سے کوئی مطالبہ نہیں کیا ہے۔

صوبائی وزیرصحت و صدر پی ٹی آئی سنٹرل پنجاب ڈاکٹر یاسمین راشد نے مزید کہا کہ وفاقی حکومت ملک میں خون خرابہ کی سیاست چاہتی ہے جبکہ وفاقی حکومت کو ہوش کے ناخن لینے چاہیئں۔