وزیر اعلیٰ گلگت بلتستان خالد خورشید نے کہا ہے کہ حکومت بچیوں کی تعلیم کے فروغ کیلئے خصوصی اقدامات کررہی ہے۔

تفصیلات کے مطابق وزیر اعلیٰ گلگت بلتستان خالد خورشید نے داریل ضلع دیامر میں گزشتہ دنوں جلائے گئے گرلز سکول کو ایک ہفتے کے مختصر مدت میں دوبارہ فعال کرنے پر چیف سیکریٹری گلگت بلتستان محی الدین وانی کی خصوصی کوششوں اور کاوشوں، کمشنر دیامر استور ڈویژن دلدار احمد ملک، دیامر کی ضلعی انتظامیہ، پولیس، محکمہ تعلیم و تعمیرات کے تمام متعلقہ افسران کو شاندار الفاظ میں خراج تحسین پیش کیا ہے۔

انہوں نے کہا کہ مختصر مدت میں متاثرہ سکول کی بحالی سے زیر تعلیم بچیوں کے چہروں پر مسکراہٹیں لوٹ آئی ہیں۔

 وزیر اعلیٰ گلگت بلتستان خالد خورشید نے مزید کہا کہ حکومت پسماندہ اور دور افتادہ علاقوں میں بچیوں کی تعلیم کے فروغ کیلئے خصوصی اقدامات کررہی ہے۔