فواد چودھری نے کہا ہے کہ پوری قوم عمران خان کے بیانیے کی پشت پر کھڑی ہے۔

تفصیلات کے مطابق مریم نواز کی لندن میں پریس کانفرنس پر پاکستان تحریک انصاف کے رہنما فواد چودھری نے ردِعمل دیتے ہوئے کہا کہ سیاسی طور پر مکمل غیرمتعلق خاتون کی بے سر و پا گفتگو کی براہِ راست نشریات نہایت شرمناک ہے۔

انہوں نے کہا کہ امپورٹڈ سرکار کے سائے میں میڈیا پر بدترین سنسرشپ عائد، صحافیوں پر عرصۂ حیات تنگ ہے مگر عوام کے مسترد شدہ گروہ کو کھل کر پراپیگنڈہ کی اجازت ہے جبکہ ہر طرح کے وسائل کے استعمال کے باوجود انہیں اپنے بیانیے کا کوئی خریدار نہیں مل رہے ہے۔

 ان کا کہنا تھا کہ پے درپے ہونے والی پریس کانفرنسز اور پھولی ہوئی سانسیں حقیقی آزادی مارچ کی کامیابی کا پیش خیمہ ہیں۔

 فواد چودھری نے کہا کہ حقیقی آزادی مارچ ناکام ہے تو مجرموں کے حکمران گروہ کی کانپیں کیوں ٹانگ رہی ہیں جبکہ آزادی مارچ کے مناظر دیکھ کر مریم کے پاپا کے پلیٹ لیٹس پھر سے تیزی سے گِر رہے ہیں، اب تو چچا کی حکومت ہے، مریم نواز ہمت کریں اور پاپا کو لیکر وطن واپس پہنچیں۔

انہوں نے کہا کہ آزادی مارچ سے خطرہ نہیں تو 41 روپے کی گرانٹ دینے، دارالحکومت کے باہر سے ہزاروں پولیس، ایف سی اور رینجرز اسلام آباد میں جمع کرنے کی ضرورت کیوں پیش آئی۔

ان کا کہنا تھا کہ پوری قوم عمران خان کے بیانیے کی پشت پر کھڑی ہے، ملک کے طول و عرض سے قافلے حقیقی آزادی مارچ کا حصہ بننے کیلئے نکل رہے ہیں۔

فواد چودھری نے کہا کہ چوری کے پیسے سے خریدی گئی جائیدادوں میں بیٹھ کر پاکستان پر بدترین سیاسی و معاشی عدمِ استحکام مسلط کیا گیا ہے جبکہ مریم کے والد کا ”مجھے کیوں نکالا“ مارچ گھنٹوں میں ہوا میں تحلیل ہوا۔

انہوں نے کہا کہ ریاست اور اسکے ادارے مجرموں کے گمراہ کن بیانیوں میں الجھنے کی بجائے عوامِ پاکستان کے فیصلے کو وقعت دیں۔

ان کا کہنا تھا کہ پہلے ووٹ کی پرچی، اب حقیقی آزادی مارچ میں بے مثال شرکت سے عوام نے واضح کردیا کہ صاف شفاف انتخابات کا فوری انعقاد کی واحد رستہ ہے۔

پاکستان تحریک انصاف کے رہنما فواد چودھری نے مزید کہا کہ پرامن احتجاج کی اصل حقیقت کو سمجھا جائے اور کٹھ پتلی راج سمیٹ کر عوام کو مستقبل کے تعین کا اختیار دیا جائے۔