لاہور: وزیر پارلیمانی امور راجہ بشارت سے برطانوی سفارتی وفد کی ملاقات ہوئی جس میں دوطرفہ امور اور پاکستان کی مجموعی صورتحال پر تبادلہ خیال کیا گیا۔

تفصیلات کے مطابق ملاقات میں برطانوی فارن آفس کے انچارج پاکستان ڈیسک رچرڈ لنڈسے نے قیادت کی۔

راجہ بشارت نے وفد سے گفتگو کرتے ہوئے کہا کہ وزیراعلی پنجاب پرویز الہی کا فوکس صرف صوبے کی ترقی ہے، پنجاب میں ریکارڈ قانون سازی کی گئی

وزیر پارلیمانی امور کا کہنا ہے کہ پی ٹی آئی پاکستان میں جلد عام انتخابات چاہتی ہے، عوام 15 روز سے سڑکوں پر ہیں، جوش و جذبہ کم نہیں ہوا، عمران خان کی مقبولیت میں روز بروز اضافہ ہو رہا ہے۔

‘نواز شریف اور عمران خان کی مقبولیت کا موازنہ ہی نہیں’

انہوں نے کہا کہ نواز شریف اور عمران خان کی مقبولیت کا موازنہ ہی نہیں، عمران خان کا ایجنڈا انصاف کی حکمرانی اور احتساب ہے۔

راجہ بشارت نے کہا کہ عمران خان ملکی خود مختاری کے حامی اور بیرونی ڈکٹیشن کیخلاف ہیں، عمران خان کے دور میں پاکستان کی معاشی صورتحال کہیں بہتر تھی۔

وزیر پارلیمانی امور مزید کہا کہ موجودہ الیکشن کمیشن کی غیرجانبداری پر سوالیہ نشان لگ چکا ہے، عمران خان عالمی برادری کے ساتھ زیادہ بہتر انداز میں ڈیل کر سکتے ہیں۔

دوسری جانب برطانوی فارن آفس کے انچارج پاکستان ڈیسک رچرڈ لنڈسے نے کہا کہ چیئرمین عمران خان پر حملے پر شدید صدمہ پہنچا۔

رچرڈ لنڈسے نے مزید کہا کہ برطانیہ پاکستان کی ترقی اور استحکام کا خواہاں ہے۔

ملاقات میں ڈپٹی پولیٹیکل قونصلر ایون ہارث، پولیٹیکل ایڈوائزر ہائی کمیشن طلال رضا، برطانوی نمائندہ برائے پنجاب مس کلارا اور پی ٹی آئی رہنما بہروز کمال راجہ بھی موجود تھے۔