جے یو آئی کے نامزد امیدوار اور پی ڈی ایم کے سربراہ مولانا فضل الرحمان کے قریبی ساتھی حاجی غلام علی کو خیبرپختونخوا کا گورنر مقرر کر دیا گیا ہے۔

صدر مملکت ڈاکٹر عارف علوی نے بدھ کو وزیراعظم شہباز شریف کی ایڈوائس پر آئین کے آرٹیکل 101 کے تحت نئے گورنر کے پی کے کی تقرری کی منظوری دی۔

اس سے قبل وفاقی حکومت نے صدر مملکت عارف علوی کو جے یو آئی کے نامزد امیدوار حاجی غلام علی کو خیبرپختونخوا کا گورنر بنانے کی سمری ارسال کی تھی۔

طویل سیاسی کشمکش کے بعد وفاقی حکومت نے بدھ کو جے یو آئی کے نامزد امیدوار اور سابق سینیٹر غلام علی کی خیبرپختونخوا کے گورنر کے عہدے پر تقرری کے لیے سمری ایوان صدر کو بھجوائی گئی تھی۔

غلام علی پشاور کے ضلعی ناظم بھی رہ چکے ہیں اور اب ان کے بیٹے زبیر علی پشاور کے میئر ہیں۔

واضح رہے کہ 10 اپریل کو سابق وزیراعظم عمران خان کے خلاف تحریک عدم اعتماد کے بعد، پاکستان تحریک انصاف (پی ٹی آئی) کے بانی اراکین میں سے ایک، شاہ فرمان نے 11 اپریل 2022 کو باضابطہ طور پر اپنا استعفیٰ پیش کیا اور اسے صدر عارف علوی کو بھجوا دیا تھا۔

اس کے بعد سے خیبرپختونخوا اسمبلی کے اسپیکر مشتاق احمد غنی آئینی تقاضوں کے مطابق لیکن محدود اختیارات کے ساتھ قائم مقام گورنر کے طور پر خدمات انجام دے رہے تھے۔

گزشتہ تقریباً آٹھ ماہ سے پاکستان ڈیموکریٹک موومنٹ کے اتحادی شراکت دار اسٹریٹجک اہمیت کے حامل صوبے کے گورنر کی تقرری پر اتفاق رائے تک پہنچنے میں ناکام رہے۔